Бухорода «Қовун сайли» бошланди (фото)

Бухоро шаҳри марказидаги Фавворалар майдонида анъанавий «Қовун сайли» байрами бўлиб ўтмоқда. Бу ҳақда «Дарё» мухбири хабар бермоқда.

Сайлда вилоят миришкорлари томонидан парваришланган 60 турдан зиёд қовун нави арзон нархларда аҳолига тортиқ қилинди. 200 дан ортиқ фермер хўжалиги томонидан 80 турга яқин қовун маҳсулотлари намойиш этилмоқда.

— Бухоро тупроғи ва табиий иқлим шароитига хос, аммо унут бўлиб кетган қовун навларини қайта тиклаш борасида талай ишлар қилинди. Изланишлар самарасида 25 дан ортиқ қовун нави қайта тикланди. «Бўрикалла», «Баргинай», «Гулоби», «Шерози», «Амири», «Кўкча», «Обинаввот», «Қорақанд» кабилар шулар жумласидан,— дейди Жондор туманидаги «Элмурод Дўстмурод Шаҳриёр» фермер хўжалиги раҳбари Дўстмурод Боймуродов.

Қовун сайли доирасида бошқа турдаги полиз маҳсулотлари, мевалар кўргазмаси ҳам бўлиб ўтди. Хориждан келган сайёҳлар ҳам улардан баҳраманд бўлди.

Тадбир давомида вилоятнинг қовун етиштирувчи деҳқонлари ўртасида турли номинациялар бўйича мусобақалар бўлиб ўтиши кўзда тутилган.