Ўзбекистон элчихонаси вакиллари Самарада заҳарланган 69 нафар фуқародан хабар олди

2019 йилнинг 19 июль куни Ўзбекистоннинг Қозон шаҳридаги Бош консули Фариддин Насриев ва Ташқи меҳнат миграция агентлигининг Москва шаҳридаги Ваколатхонаси раҳбари Саиднўмон Мансуров «Кошелевский посад» корхонасида ишлайдиган Ўзбекистон фуқароларининг заҳарланиш белгилари билан касалхонага ётқизилиши тафсилотларини аниқлаш учун Самара вилоятига ташриф буюрди. Бу ҳақда Ташқи ишлар вазирлиги Консуллик-ҳуқуқий департаменти хабарида айтилади.

Мазкур ташриф доирасида Ўзбекистон вакиллари ватандошларимиз даволанаётган В.Д.Середавина номидаги Самара вилояти клиник касалхонасига ва 1-сонли Тольяттинск шаҳар клиник касалахонасига ташриф буюриб беморлар ҳолидан хабар олди, улар билан суҳбатлашди. Маълум бўлишича, касалхонада даволанаётган Ўзбекистон фуқароларининг жами сони 69 нафар, жумладан 1 нафар бола бўлиб, улардан уч нафари реанимация бўлимида. Уларнинг соғлиқлари ҳолати барқарор-оғир. Айни пайтда заҳарланиш сабабларини аниқлаш учун текширув олиб борилмоқда.

Шунингдек, мазкур ҳудуд, вилоят соғлиқни сақлаш вазирлиги раҳбарлари, тиббиёт муассасалари бошлиқлари ва «Кошелевский посад» корхонаси директори билан учрашувлар ўтказилди.

Учрашув ва музокаралар якунларида қуйидаги келишувларга эришилди:

- беморларни даволаш билан боғлиқ барча харажатлар иш берувчи ҳисобидан қопланади;

- Ўзбекистон фуқароларининг паспорт ва меҳнат патентлари эгаларининг қўлларига топширилади;

- фуқароларнинг овқатланиш ва яшаш шароитларини қўшимча яхшилаш бўйича чоралар кўрилади;

- иш ҳақи миқдорини ошириш масаласи кўриб чиқилади.

Вазият Бош консулхона назоратида турибди.

Консуллик-ҳуқуқий департаменти эслатадики, Россиянинг Волга бўйи федерал округи (Бошқирдистон Республикаси, Марий Эл Республикаси, Мордовия Республикаси, Нижегород вилояти, Оренбург вилояти, Пенза вилояти, Пермь ўлкаси, Самара вилояти, Саратов вилояти, Татаристон Республикаси, Удмуртия Республикаси, Ульянов вилояти, Чувашия Республикаси) ҳудудидаги ўзбекистонликлар зарур вазиятларда мамлакатнинг Қозон шаҳридаги Бош консулхонасига қуйидаги телефон орқали мурожаат қилишлари мумкин: +7-967-772-66-00.