Жорий йил 6—8 сентябрь кунлари Хивада халқаро камондан отиш ва миллий ўйинлар фестивали ўтказилади. Бу ҳақда «Дарё»га Хоразм вилояти туризмни ривожлантириш департаменти матбуот хизмати маълум қилди.
Ушбу фестивал Хоразмда илк маротаба ўтказилаётганлиги боис уни юқори савияда ташкиллаш Бутунжаҳон этноспорт конфедерацияси тажрибасига таянилмоқда. Ушбу конфедерация раҳбари, Камончилар фонди васийлик кенгаши раиси, Туркия ёшлар фонди олий маслаҳат кенгаши аъзоси Билол Эрдўғон бошчилигида бир гуруҳ меҳмонлар Хоразмга келди.
Меҳмонлар мазкур спорт фестивали ўтказиладиган «Ичан-Қалъа» давлат музей-қўриқхонаси ҳудудини кўздан кечирди. Халқаро турнирга бағишланган конференцияда иштирок этди.
Хива шаҳридаги "Нуриллабой" саройида ўтказилган конференцияда Хоразм вилояти ҳокими Фарҳод Эрманов, Инновацион ривожланиш вазири ўринбосари Ойбек Норинбоев, Камондан отиш федерацияси раиси Отабек Имомов, Бутунжахон этноспорт конфедерацияси президенти Нажмиддин Билол Эрдўғон, Туркия ўқчилар вақфи раҳбари Ҳайдарали Илдиз, шунингдек, маҳаллий ОАВ вакиллари қатнашди.
Анжуман давомида журналистлар фестивал ўтказилиши, қамрови ва ёритилиши билан боғлиқ турли саволлар билан мурожаат қилди. Мутасаддилар бунга жавобан тадбир 1000 нафардан ортиқ иштирокчини қамраб олиши, Туркия ОАВларида кенг ёритилиши ва бир қатор мамлакатлар дипломатик корпус вакиллари ҳам қатнашиши кутилаётгани ҳақида маълум қилди.
Изоҳ (0)