Фуқаролик ишлари бўйича Каттақўрғон туманлараро судининг буйруғига асосан қарздор У.Х. томонидан ундирувчи Г.М.нинг фойдасига уч нафар фарзандининг вояга етгунларига қадар моддий таъминоти учун ҳар ойдаги иш ҳақи ва бошқа даромадларининг иккидан бир қисми миқдорида ундириш белгиланган. Бу ҳақда «Дарё»га МИБ матбуот хизмати маълум қилди.
Лекин қарздор ҳозирги кунгача ундирувчи Г.М.га 23 миллион 367 минг алимент пулларини тўлаб бермаган.
Шунингдек, суд буйруғига асосан қарздор У.Х. томонидан ундирувчи О.Х. фойдасига бир нафар фарзандининг вояга етгунига қадар моддий таъминоти учун ҳар ойдаги иш ҳақи ва бошқа даромадларининг тўртдан бир қисми миқдорида 2 миллион 744 минг сўм тўлаб бориши белгиланган бўлса-да, алимент пуллари У.Х. томонидан қасддан тўлаб берилмаган.
Шу сабабли Нуробод туман маъмурий судининг қарори билан У.Х.га 15 сутка маъмурий қамоқ жазоси тайинланган. Маъмурий қамоқ жазосини ўтаб чиқиб, ўзига тегишли хулоса чиқармасдан, қасддан вояга етмаган тўрт нафар фарзандини моддий таъминлашдан бўйин товлаб келиши оқибатида бугунги кунга келиб унинг қарздорлиги 32 миллион 740 минг сўмни ташкил этган.
Мазкур ҳолат юзасидан Мажбурий ижро бюроси Нуробод туман бўлими томонидан фуқаро У.Х.га нисбатан Жиноят Кодексининг 122-моддаси 1-қисми билан жиноят иши қўзғатилиб, суриштирув ҳаракатлари олиб борилмоқда.
Изоҳ (0)