Азиз Абдуҳакимов: Ўзбекистон ҳар йили ташриф буюрадиган туристлар сонини 10 млн кишига етказиш ниятида

Ўзбекистон йилига хориждан 10 миллион турист ташриф буюрадиган давлатга айланишни мақсад қилган. Бу ҳақда бош вазир ўринбосари Азиз Абдуҳакимовга асосланиб, «Podrobno.uz» хабар берди.

«Ҳозирда биз Ўзбекистонга ташриф буюрадиганлар сонини 10 миллионга етказиш бўйича махсус дастур ишлаб чиқяпмиз. Ушбу натижага эришиш мумкин деб ўйлайман. Жорий йилдаги ҳисоб-китобларимизга кўра, 5,9 миллион одам ташриф буюриши керак эди. Бу ўтган йилгига нисбатан сезиларли даражада ўсиш ҳисобланади. Биринчи ярим йиллик натижаларига кўра, мамлакатимизга келган туристлар сони 3 миллиондан ошганини кўриб, йил охирига қадар мазкур кўрсаткич 6,4 миллионни ташкил этишидан умидвормиз», — дейди бош вазир ўринбосари.

Шунингдек, Азиз Абдуҳакимовнинг таъкидлашича, Ўзбекистон ҳукумати Халқаро блогерлар ва инфлюэнсерлар форумини ўтказиш ниятида, унга ижтимоий медиа оламидаги 100 дан ортиқ мутахассис ташриф буюради.

Туристларни жалб қилишдаги яна бир муҳим йўналиш — туристик брендни Англия премьер-лигаси ва таниқли теннисчилар билан ҳамкорлик орқали кенг оммага ёйиш.

Бундан ташқари, Ўзбекистон дунёдаги энг йирик лоукостерларни чақириб, халқаро авиафорум ҳам ўтказади.