Ўзбекистон Президентининг кенжа куёви Отабек Умаров Тесла автомобилида тезликни оширгани учун 1,8 миллион сўм жарима тўлади. Бу ҳақда у Instagram’даги саҳифасида маълум қилган.
«Куни кеча оммавий ахборот воситаларида, ижтимоий тармоқларда мен билан боғлиқ видеонинг тарқалгани Президентимизнинг очиқлик ва сўз эркинлиги сиёсати амалда эканини кўрсатади, деб ўйлайман.
Журналистлар ва блогерлар ҳақиқатан ҳам реал ҳаётимизда бор муаммоларни кўтариб чиқаётгани қувонарли. Сизлар жамиятда рўй бераётган воқеаларга бефарқ эмаслигингиз, одамларнинг мавқеи ва лавозимидан қатъи назар танқид қилаётганингиз бизни ўз устимизда янада кўпроқ ишлашга ва тартибга риоя қилишга чақиради.
Бугуноқ барча жарималар тўланди. Қонун барча учун баробар! Шу фурсатдан фойдаланиб, маҳаллий ва хорижий оммавий ахборот воситаларининг жонкуяр ходимларига ўз миннатдорчилигимни билдираман!» — дейди Умаров жарима квитанцияси акс этган фотога қолдирилган изоҳда.
Жарима Маъмурий жавобгарлик тўғрисидаги кодекснинг 128−3-моддаси 3-қисмига (транспорт воситалари ҳайдовчиларининг белгиланган ҳаракат тезлигини соатига 40 километрдан ортиқ катталикда ошириб юборганлиги) асосан тайинланган.
19 июль куни «Озодлик» радиоси Отабек Умаровнинг Instagram-аккаунти Stories бўлимида жойлаштирилган видеони эълон қилганди. Видеода Умаров Тесла автомобили тезлигини соатига 201 километргача чиқарганини кўриш мумкин.
Изоҳ (0)