Бухорода 2-маротаба ўтказилган Гуллар байрами уч кун давом этди. Абу Али ибн Сино номли 8 гектарли Фавворалар майдони 130 та корхона ва ташкилот томонидан қарийб 1,5 миллионга яқин 50 турдан зиёд гуллар билан безатилди. Бу ҳақда «Дарё» мухбири хабар бермоқда.
120 турли элемент ва декорациялардан тайёрланган машиналар, турли жонивор ва қушлар тимсоли карвони кўҳна шаҳарга саёҳатга келган хорижлик меҳмонларнинг ҳам қизиқишига сабаб бўлди.
Ўрта махсус касб-ҳунар таълими вилоят бошқармаси бошлиғи Ҳамид Қобиловнинг маълум қилишича, 4х6 ҳажмли китоб рамзи — «Гуллар байрами»нинг дурдонасига айланган. Ушбу «Гулкитоб» тайёрланишида 20 га яқин моҳир гулчилар ва дизайнерлар жалб қилинган.
— Бухороликлар азалдан маърифатпарвар, китобга, илму зиёга ошно эканлигини Гуллар байрамида ҳам намоён эта олишгани таҳсинга лойиқ. Шундай гўзаллик, шундай жозиба олдида мен китобга бўлган меҳру муҳаббатимни изҳор этмаслигим мумкинми, — деди вилоят раҳбари Ўктам Барноев ҳамда китобга бўлган ҳурматини «Гулкитоб» олдида тиз чўкиб ифодалади.
Гуллар байрамини янада жозибадор ўтказиш учун Самарқанд, Тошкент ҳамда Наманган вилоятларидан тажрибали тадбиркор гулчилар таклиф этилган. Улар томонидан бухоролик гулчилар ўз пешона тери эвазига шўр тупроққа, тўғрироғи, туз устида ҳам бўстон яратишга қодир, улар чинакам бободеҳқонлардир, дея эътироф этилган.
Изоҳ (0)