Президент Шавкат Мирзиёевнинг 2017 йил 21 ноябрдаги «Мард ўғлон» давлат мукофотини таъсис этиш чора-тадбирлари тўғрисида»ги қарорига асосан мамлакатнинг иқтидорли йигитлари фан, таълим, тиббиёт, маданият, адабиёт, санъат, спорт, ишлаб чиқариш, ҳарбий хизмат соҳалари ва ҳуқуқни муҳофаза қилиш органларидаги фаолиятида эришган алоҳида ютуқлари учун тақдирланди, бу ҳақда Халқ таълим вазирлиги ахборот хизмати хабар қилади.
Хусусан, ушбу мукофотга мамлакатимизда амалга оширилаётган кенг кўламли ислоҳотларда фаоллик кўрсатиб, ўзининг билим ва иқтидори, интилувчанлиги ва ташаббускорлиги, ҳалол ва самарали меҳнати билан Ватан тараққиётига муносиб ҳисса қўшиб келаётган, юксак маънавиятли, мустақил фикрловчи, қатъий ҳаётий позиция, кенг дунёқараш ва юқори салоҳиятга эга, юрт истиқболи учун масъулиятни ўз зиммасига олишга қодир бўлган фидойи ва мард ўғлонлар лойиқ деб топилди.
Эътиборлиси, икки нафар мактаб ўқувчиси ҳам ноёб истеъдоди ва эришган ютуқлари учун мукофотланганлар қаторидан ўрин олди. Бухоро вилояти, Қоракўл туманидаги 1-ихтисослаштирилган умумий ўрта таълим мактаб-интернатининг 9-синф ўқувчиси Дониёр Исмоилов ҳамда Сирдарё вилояти, Боёвут туманидаги 30-умумий ўрта таълим мактабининг 11-синф ўқувчиси Нодирбек Баҳромов «Мард ўғлон» давлат мукофоти билан тақдирланиб, совриндорлик дипломи ва кўкрак нишонига эга бўлди.
Изоҳ (0)