Навоийнинг Кармана туманида мудҳиш қотиллик содир бўлди, деб хабар бермоқда «Халқ сўзи Online». 1990 йилда туғилган фуқаро Ф.С. 28 июнь куни соат 08:00 лар атрофида Кармана тумани, «Шибзон» МФЙда истиқомат қилувчи қудасининг ҳовлисига келиб, тўрт кун муқаддам, яъни 24 июнь куни ўз жонига қасд қилган синглисининг ўлимига улар сабабчи бўлганлигини иддао қилган.
Тортишувлардан сўнг фуқаро Ф.С. хонадон эгаси ҳамда унинг икки нафар қизига ўзи билан олиб келган ошхона пичоғи билан уларнинг танасининг турли жойларига тан жароҳати етказиб, ҳодиса жойидан яширинган.
Олинган оғир тан жароҳатлари натижасида хонадон эгаси воқеа жойида, унинг бир нафар қизи эса шифохонага олиб борилаётганида йўлда вафот этган. Учинчи жабрланувчи эса ҳозирда Кармана тумани тиббиёт бирлашмасининг «жонлантириш» бўлимига ётқизилган.
Маълум бўлишича, қотиллик содир этган шахснинг синглиси икки ой олдин шу хонадонга келин бўлиб тушган. Қашқадарё вилояти, Косон туманида жойлашган ҳарбий қисмда фаолият олиб бораётган куёв тўйдан сўнг келин билан шу туманда ижарага уй олиб, бирга яшашган.
Таъкидланганидек, ҳодисадан тўрт кун аввал келин ушбу ижара уйида ўз жонига қасд қилиб, вафот этган. Мазкур ҳолат юзасидан бугунги кунда Косон туман прокуратураси томонидан терговга қадар текшириш ҳаракатлари ўтказилмоқда.
Хабарда айтилишича, 28 июнь куни содир бўлган мудҳиш қотиллик юзасидан Ф.С.га нисбатан Жиноят Кодексининг 97-моддаси 2-қисми «а» банди билан жиноят иши қўзғатилиб, тергов ҳаракатлари вилоят прокуратураси ўта оғир жиноятларни тергов қилиш бўлими томонидан олиб борилмоқда.
Изоҳ (0)