Тошкент шаҳар ИИББ ижтимоий тармоқларда итга нисбатан шафқатсизлик акс этган видео юзасидан текширув ўтказди. Бу ҳақда вазирлик матбуот хизмати хабар берди.
Аниқланишича, итнинг эгаси 37 ёшли Оқилжон И. таниши 57 ёшли Икром Б.дан вояга етмаган 16 ёшли Шухрат А. исмли қариндошини тишлаган алабай зотли итини отиб ўлдиришни сўраган. Оқилжонни гапига кўра ит «қутурган» бўлган, аммо Шухрат А. шифокорга мурожаат қилмаган.
22 июнь куни тахминан соат 10.00 да Оқилжон И. ўз итини «Бектемир гўшт комбинати» МЧЖ ҳудудига олиб келган ва у ерда Икром Б. 35 ёшли ўғли Чингиз Б.га тегишли 2018 йилда ички ишлар органларида рўйхатдан ўтказилган «ТОЗ-34» русумли ов қуроли билан итни отиб ўлдирган. Сўнг 39 ёшли Сергей Ч. итнинг гўштини овқат тайёрлаш мақсадида ажратиб олган.
Бўлиб ўтган воқеани уларнинг таниши бўлган 24 ёшли Сардор Х. ўзига тегишли телефонга видеога олиб, Instagram’даги саҳифасига жойлаган. Сардор Х.нинг айтишича, унда ушбу видеони тарқатиш мақсади бўлмаган, аммо обуначиларидан бири видеони тарқатаётганлигини билгач, саҳифасидаги видео кўриш имкониятини чеклаб қўйган.
Бектемир тумани ИИО ФМБ томонидан Оқилжон И. ва Икром Б.га нисбатан жониворга нисбатан шафқатсизлик қилганлик факти бўйича Маъмурий жавобгарлик тўғрисидаги кодекснинг 111-моддаси («Ҳайвонларга нисбатан шафқатсиз муносабатда бўлиш») асосида баённома тузилган. Бектемир тумани Маъмурий суди томонидан улар айбдор деб топилиб, ҳар бирига 405 460 сўм жарима солинди.
Сергей Ч.га нисбатан Маъмурий жавобгарлик тўғрисидаги кодекснинг 161-моддаси («Шаҳарларни ва бошқа аҳоли пунктларини ободонлаштириш қоидаларини бузиш») бўйича маъмурий ҳуқуқбузарлик тўғрисидаги баённома тузилди. Бектемир тумани Маъмурий суди томонидан унга 202 730 сўм жарима солинди.
Сардор Х. маъмурий суд томонидан Маъмурий жавобгарлик тўғрисидаги кодекснинг 189-1-моддаси («Зўравонликни ёки шафқатсизликни тарғиб қилувчи маҳсулотни тайёрлаш, олиб кириш, тарқатиш, реклама қилиш, намойиш этиш») бўйича айбдор деб топилиб, унга нисбатан энг кам иш ҳақининг 50 баравари миқдорида, яъни 10 136 500 сўм жарима жазоси қўлланилди.
Бундан ташқари, ўқотар қурол ва ўқ-дориларни сақлаш ва улардан фойдаланиш қоидалари бузилганлиги сабабли, ўқотар қурол эгаси бўлмиш Чингиз Б.га нисбатан Маъмурий жавобгарлик тўғрисидаги кодекснинг 221-моддасида («ўқотар қуролларни рўйхатдан ўтказиш (қайта рўйхатдан ўтказиш) муддатларини ёки уларни ҳисобдан ўтказдириб қўйиш қоидаларини бузиш») кўрсатилган ҳуқуқбузарлик тўғрисида баённома тузилиб, Бектемир тумани маъмурий суди томонидан 67 576 сўм жарима белгиланди.
Изоҳ (0)