Инсон ресурсларини тадқиқ қилиш соҳасида дунёдаги энг йирик консалтинг ташкилот — Mercer компанияси ҳисоботига кўра, Тошкент экспатлар (экспатриант — чет эллик ишчи ёки корхонанинг чет элда ишлайдиган ходими) учун дунёда энг арзон шаҳар деб ҳисобланмайдиган бўлди. Бу ҳақда Spot хабар берди.
Тадқиқот 25 йилдан буён олиб борилаётган бўлиб, 209 та шаҳарни қамраб олади ва ўз ходимларини чет элда ишлашга юбораётган компаниялар харажатларни тўғри ҳисоблаши учун мўлжалланган.
Мезонлар сифатида яшаш нархи кўриб чиқилган, таққослаш учун таянч шаҳар сифатида Нью-Йорк, валюта сифатида АҚШ доллари олинган. Бундан ташқари, транспорт ва кийим-кечакдан тортиб уй учун маҳсулотлар ва кўнгилочар машғулотларгача бўлган 200 дан ортиқ буюмлар баҳоси кўриб чиқилган.
Экспатлар учун энг қиммат шаҳарлар рейтингида Гонконг етакчиликни сақлаб қолди. Иккинчи ўринда — Токио, учинчи ўринда — Сингапур. Биринчи ўнталикка шунингдек, Сеул, Цюрих, Шанхай, Ашхобод, Пекин, Нью-Йорк, Шенжен киритилди.
Тошкент экспатлар учун дунёда энг арзон шаҳар номини Тунисга бўшатиб берди. Ўнталикдан, шунингдек, Карачи, Бишкек, Банжул, Виндхук Исломобод, Тбилиси ва Скопе жой олди. Тадқиқотда қайд этилишича, ушбу шаҳарлардаги нуфузли ҳудудларда озиқ-овқатдан тортиб уй-жойгача барча нарсалар жуда арзонлигича қолмоқда.
Аввалроқ Mercer яшаш учун энг яхши шаҳарлар рейтингини эълон қилганди. Унда Тошкент 231 ўриндан 201-ўринни олганди.
Изоҳ (0)