Қирғизистон бош прокурори Ўткурбек Жамшитов собиқ президент Алмазбек Атамбаев махсус комиссия томонидан кўрсатилган олти жиноятнинг бештасига алоқадор бўлиши мумкинлигини маълум қилди, деб Sputnik хабар қилади.
Манбанинг ёзишича, 25 июнь, сешанба куни Жогорку Кенешнинг конституциявий қонунчилик, давлат тузилиши, суд-ҳуқуқ масалалари ва регламент бўйича қўмитаси собиқ президент мақомидан маҳрум қилиш учун Атамбаевга қарши айбловни илгари суриш ҳақидаги хулосани кўриб чиққан.
Жамшитовнинг сўзларига кўра, Қирғизистон собиқ президенти Атамбаевга беш эпизод бўйича айблов қўйилиши мумкин. У гап Қўй-Тош қишлоғида ер участкаларининг ноқонуний эгалланиши, жиноий авторитет Азиз Батукаевнинг қонунга зид равишда озод этилиши, Бишкек ИЭС модернизацияси бўйича коррупция иши ва унга ноқонуний тарзда кўмир етказиб берилиши ҳамда тадбиркор Субихи Пархати иштирокидаги коррупция факти ҳақида бораётганини таъкидлади.
Қирғизистон парламенти 13 июнь куни махсус комиссияни ташкил этганди ва у олиб борган иш якунида Атамбаев олтита жиноятга алоқадор бўлиши мумкинлиги баёнот қилинганди. Мамлакат парламенти 20 июнь куни махсус комиссия хулосасини маъқуллаган ва ҳужжатни Бош прокуратурага йўллаганди.
Изоҳ (0)