Ноқонуний сарфланган маблағларнинг 1,3 миллиард сўми бюджетга тикланди. Spot’нинг хабар беришича, 2019 йилда Олий ва ўрта махсус, касб-ҳунар таълими вазирлиги тизимидаги 1147 та касб-ҳунар коллежлари бўйича ўтказилган камерал назорат тадбирлари натижасида 2,1 миллиард сўм бюджет маблағларининг асоссиз харажатлари олди олинди.
Бундан ташқари, масофавий назорат тадбирлари натижасида кузатилган шубҳали молиявий операциялар юзасидан 205 та касб-ҳунар коллежи ва академик лицейларда ўтказилган назорат тадбирлари натижасида 8,3 млрд сўмлик бюджет маблағлари бюджет қонунчилиги талабларига амал қилинмаган ҳолда сарфланганлиги аниқланди.
Жумладан, назорат тадбири ўтказилган касб-ҳунар коллежларининг 15 тасида ҳақиқатда ишламаган шахслар номига иш ҳақи ҳисобланиши оқибатида улар номидаги пластик карточкаларига 2705,3 миллион сўм бюджет маблағлари асоссиз ўтказиб юборилган.
Мисол учун, Тошкент шаҳар Олмазор тиббиёт коллежида ҳақиқатда ишламаган ва ўтган йилларда ишдан бўшаб кетган ходимларнинг фамилияси, исми ва шарифини ойлик иш ҳақи ва унга тенглаштирилган тўловлар қайдномаларига киритилиб жами 1, 847,3 миллион сўм бюджет маблағлари ноқонуний тўловга чиқарилган.
Шунингдек, ушбу коллежда тўлов контракт асосида ўқишга қабул қилинган 13 нафар талабалардан ундирилган 21,2 миллион сўм миқдоридаги контракт пуллари банк муассасаси орқали коллежнинг ҳисоб рақамига кирим қилинмасдан сохта тўлов ҳужжатларини расмийлаштириш йўли билан харажатга чиқарилган.
Шунингдек, айрим касб-ҳунар коллежларининг бош ҳисобчилари томонидан бюджет ташкилотлари бухгалтерия ҳисобининг автоматлаштирилган тизими («O‘zASBO» дастурий мажмуаси) иш ҳақини ҳисоблаш модулининг қайта ҳисоб-китоблар қисмига асоссиз маълумотлар киритиш йўли билан 2 774 миллион сўмлик бюджет маблағлари ортиқча сарфланган.
Бир қатор касб-ҳунар коллежларида эса ходимларнинг иш ҳақларини «O‘zASBO» дастурий мажмуасида ҳисобланиб, пластик карточкаларига ўтказиш рўйхати белгиланган тартибда банк муассасаларига тўғридан тўғри электрон (online) тарзда юборилмасдан, амалдаги тартибга зид равишда бошқа рўйхатларни хизмат кўрсатувчи тижорат банкларига тақдим этиш йўли билан 353 миллион сўм бюджет маблағлари асоссиз харажатга чиқариб юборилган.
Назорат тадбирлари давомида кўрилган чора-тадбирлар натижасида ноқонуний сарфланган маблағларнинг 1,3 миллиард сўми бюджетга тикланиши таъминланди.
Шунингдек, 7,3 миллиард сўмлик бюджет интизомини бузиш ҳолатлари аниқланган 92 та назорат тадбирлари ҳужжатлари қонуний чоралар кўриш учун прокуратура органларига юборилди ҳамда бюджет ва смета-штат интизомининг бузилишига йўл қўйган касб-ҳунар коллежларининг 15 нафар мансабдор шахсларига ўрнатилган тартибда маъмурий жарима қўлланилди.
Изоҳ (0)