Бухорода лизингга GM Uzbekistan автомобилларини олиб беришни ваъда қилган фирибгарлар ушланди

Бухорода 120 нафар фуқарога лизингга автомобиль олиб беришни ваъда қилган кўзбўямачилар фош этилди. Бу ҳақда Sputnik хабар бермоқда.

33-ёшли А.Ш., 31-ёшли И.Д. ва 41-ёшли С.И. жинояткорона тил бириктирган ҳолда Бухоро вилоятида «UZ АВТО....» МЧЖни рўйхатдан ўтказган. Шундан сўнг улар фуқароларга лизингга GM Uzbekistan автомобиллари олиб беришни ваъда қилиб, Шофиркон, Жондор, Когон ва Бухорода очилган филиаллари орқали пул йиғиб ола бошлаган.

Жами 120 киши уларга пул топширган. Кўзбўямачилар жамланган пулларни қалбаки ҳужжатлар ва шартномалар ёрдамида ўз харажатлари учун сарфлаб юборган.

Ушбу воқеа юзасидан А.Ш., И.Д. ва С.И.га нисбатан жиноий иш қўзғатилиб, гумон қилинаётган шахслар ҳибсга олинган.