Қорақалпоғистонда мактаб битирувчиларига олтин ва кумуш медаллар топширилди

Бердақ номидаги Қорақалпоқ давлат академик мусиқали театрида умумий ўрта таълим муассасаларининг иқтидорли битирувчиларини тақдирлаш маросими бўлиб ўтди, бу ҳақда ЎзА хабар қилади.

Тадбирда Қорақалпоғистон Республикаси Халқ таълими вазири А.Аяпов ва бошқалар мамлакатда таълим соҳасида амалга оширилаётган кенг кўламли ислоҳотлар, педагоглар меҳнатини рағбатлантириш, иқтидорли ўқувчиларни қўллаб-қувватлаш борасида амалга оширилаётган ишларга тўхталди.

Қорақалпоғистон Республикасидаги жами 706 та умумтаълим мактабини 2018—2019-ўқув йилида 14 минг 683 нафар ўқувчи тамомлади.

Ўзбекистон Республикаси Вазирлар Маҳкамасининг жорий йил 22 февралдаги «Умумий ўрта таълим муассасалари ва академик лицейлар битирувчиларини рағбатлантиришни янада такомиллаштириш чора-тадбирлари тўғрисида«ги қарорига мувофиқ, ҳудуддан 161 нафар ўқувчи олтин, 161 нафари кумуш медаль билан тақдирланди.

Тадбирда медаллар ўз эгаларига тантанали топширилди, турли кўрик-танловлар ғолибларига эсдалик совғалари берилди.

Жорий ўқув йили Қорақалпоғистон Республикаси таълим соҳаси учун муваффақиятли якунланмоқда. Шу йилнинг 8—10 июнь кунлари касб-ҳунар коллежлари ва умумий ўрта таълим муассасалари ўқувчилари ўртасида Тошкент шаҳрида ўтказилган фан олимпиадасида Қораўзак туманидаги 1-умумий ўрта таълим мактабининг 11-синф ўқувчиси Ойзода Тилеўова қорақалпоқ тили ва адабиёти фанидан, Қўнғирот туманидаги 21-умумий ўрта таълим мактабининг 11-синф ўқувчиси Балнура Ўринбоева қозоқ тили ва адабиёти фанидан биринчи ўринни эгаллади. Қувонарлиси, бу икки ўқувчи муддатидан олдин олий ўқув юртларига ўқишга кириш имкониятига эга бўлди.

Шунингдек, Чимбой туманидаги 5-умумий ўрта таълим мактабининг 9-синф ўқувчиси Дамир Дилмуратов математика фанидан, Нукус шаҳридаги 46-ихтисослаштирилган умумий ўрта таълим мактабининг 11- синф ўқувчиси Алибек Аметбеков иқтисодиёт таълими асослари фанидан халқаро олимпиадага йўлланма олди. Нукус шаҳридаги 31-ихтисослаштирилган умумий ўрта таълим мактабининг «Жайҳун» жамоаси «Ёш қутқарувчи» кўрик-танловининг мамлакатимиз босқичида ғолиб бўлиб, халқаро мусобақада иштирок этиш ҳуқуқини қўлга киритди.

Тақдирлаш маросимида битирувчиларга санъат усталарининг концерт дастури намойиш этилди.