Berdaq nomidagi Qoraqalpoq davlat akademik musiqali teatrida umumiy o‘rta ta’lim muassasalarining iqtidorli bitiruvchilarini taqdirlash marosimi bo‘lib o‘tdi, bu haqda O‘zA xabar qiladi.
Tadbirda Qoraqalpog‘iston Respublikasi Xalq ta’limi vaziri A.Ayapov va boshqalar mamlakatda ta’lim sohasida amalga oshirilayotgan keng ko‘lamli islohotlar, pedagoglar mehnatini rag‘batlantirish, iqtidorli o‘quvchilarni qo‘llab-quvvatlash borasida amalga oshirilayotgan ishlarga to‘xtaldi.
Qoraqalpog‘iston Respublikasidagi jami 706 ta umumta’lim maktabini 2018—2019-o‘quv yilida 14 ming 683 nafar o‘quvchi tamomladi.
O‘zbekiston Respublikasi Vazirlar Mahkamasining joriy yil 22-fevraldagi “Umumiy o‘rta ta’lim muassasalari va akademik litseylar bitiruvchilarini rag‘batlantirishni yanada takomillashtirish chora-tadbirlari to‘g‘risida“gi qaroriga muvofiq, hududdan 161 nafar o‘quvchi oltin, 161 nafari kumush medal bilan taqdirlandi.
Tadbirda medallar o‘z egalariga tantanali topshirildi, turli ko‘rik-tanlovlar g‘oliblariga esdalik sovg‘alari berildi.
Joriy o‘quv yili Qoraqalpog‘iston Respublikasi ta’lim sohasi uchun muvaffaqiyatli yakunlanmoqda. Shu yilning 8—10-iyun kunlari kasb-hunar kollejlari va umumiy o‘rta ta’lim muassasalari o‘quvchilari o‘rtasida Toshkent shahrida o‘tkazilgan fan olimpiadasida Qorao‘zak tumanidagi 1-umumiy o‘rta ta’lim maktabining 11-sinf o‘quvchisi Oyzoda Tileo‘ova qoraqalpoq tili va adabiyoti fanidan, Qo‘ng‘irot tumanidagi 21-umumiy o‘rta ta’lim maktabining 11-sinf o‘quvchisi Balnura O‘rinboyeva qozoq tili va adabiyoti fanidan birinchi o‘rinni egalladi. Quvonarlisi, bu ikki o‘quvchi muddatidan oldin oliy o‘quv yurtlariga o‘qishga kirish imkoniyatiga ega bo‘ldi.
Shuningdek, Chimboy tumanidagi 5-umumiy o‘rta ta’lim maktabining 9-sinf o‘quvchisi Damir Dilmuratov matematika fanidan, Nukus shahridagi 46-ixtisoslashtirilgan umumiy o‘rta ta’lim maktabining 11- sinf o‘quvchisi Alibek Ametbekov iqtisodiyot ta’limi asoslari fanidan xalqaro olimpiadaga yo‘llanma oldi. Nukus shahridagi 31-ixtisoslashtirilgan umumiy o‘rta ta’lim maktabining “Jayhun” jamoasi “Yosh qutqaruvchi” ko‘rik-tanlovining mamlakatimiz bosqichida g‘olib bo‘lib, xalqaro musobaqada ishtirok etish huquqini qo‘lga kiritdi.
Taqdirlash marosimida bitiruvchilarga san’at ustalarining konsert dasturi namoyish etildi.
Izoh (0)