Қозоғистоннинг Туркистон вилояти, Сариоғоч туман судида 2018 йил январь ойида Ақтўбеда ёниб кетган автобус эгаси Ордухан Мехтиевга нисбатан суд иши бошланди. Бу ҳақда Sputnik хабар бермоқда.
Асосий суд мажлиси гувоҳлар келмаганлиги сабабли бир неча бор қолдирилди. Судья Тасболат Машрапов навбатдаги суд мажлисига гувоҳларни мажбуран олиб келиш тўғрисида қарор қабул қилди. Қарор ижросини туман полиция ва прокуратура ходимлари таъминлайди.
Судья Туркистон вилоятида истиқомат қилувчи уч нафар гувоҳни чақиртириш ҳақида қарор қабул қилди. Уларнинг барчаси Ақтўбе фожиаси бўйича аввалги суд жараёнида иштирок этган.
Асосий судланувчи Ордухан Мехтиев — ўзбекистонлик 52 йўловчи ҳалок бўлган автобус эгаси. Унга Қозоғистон Жиноят кодексининг 348-моддаси 4-қисми («Транспорт воситаларини сифатсиз таъмирлаш ёки уларни техник носозларни эксплуатацияга чиқариш, эҳтиётсизлик оқибатида икки ва ундан ортиқ шахс ўлимига олиб келиш») бўйича айблов эълон қилинган.
Бу модда 4 йилдан 7 йилгача озодликдан маҳрум этиш жазо чорасини назарда тутади. 2018 йил январида фожиадан сўнг Мехтиев дарҳол қочиб, Ўзбекистон ҳудудида терговдан яшириниб юрганди.
Қозоғистон Ички ишлар вазирлиги уни халқаро қидирувга берди. 2018 йил охирида Мехтиев Ўзбекистон ҳуқуқ-тартибот органлари томонидан қўлга олинган ва Қозоғистон томони сўровига асосан Чимкентга депортация қилинган.
Ҳозирги вақтда судланувчи Чимкентдаги тергов изоляторида сақланмоқда. Суд жараёни очиқ тарзда ўтказилмоқда.
Изоҳ (0)