20 июнь куни тонгда айрим техник носозликлар сабаб, болаларни умумий ўрта таълим муассасаларига қабул қилиш тизими вақтинча ишдан чиқди, деб хабар бермоқда Давлат хизматлари агентлиги.
Давлат хизматлари агентлиги мутахассислари томонидан мазкур муаммо тезкорлик билан бартараф этилди. Белгиланган 81 та мактабга қабул пойтахтнинг барча Давлат хизматлари марказларида 21 июнь куни соат 9:00 дан бошланади.
Тез кунларда эса ҳужжатларни онлайн тартибда my.gov.uz портали орқали олиш имкони яратилади.
Давлат хизматлари агентлиги келтирилган ноқулайликлар учун узр сўраб қолган.
Маълумот учун: Мактабларга ҳужжатларни Давлат хизматлари маркази орқали топшириш учун фақатгина 2 та ҳужжат талаб этилади:
- ота-онанинг паспортлари;
- боланинг туғилганлик тўғрисидаги гувоҳномаси.
Эслатиб ўтамиз, 20 июнь куни Ўзбекистон умумий ўрта таълим муассасаларига қабул жараёни бошланди. Тошкент шаҳридаги 81 та талаб юқори мактабларда 1-синфга қабул жараёни Давлат хизматлари марказлари ёки Ўзбекистон Республикаси Ягона интерактив давлат хизматлари портали орқали амалга оширилади. Шу билан бирга қолган 9610 та мактабда қабул жараёни таълим муассасасининг ўзида бўлиб ўтади.
Изоҳ (0)