Ўзбекистон аукцион савдоларида бошланғич нархи 1 сўмга тенг 14 та давлат мулки объекти сотилди

10−14 июнь кунлари «E-ijro auksion» электрон онлайн-аукцион савдоларида бошланғич нархи 1 сўмга тенг қийматдаги 14 та бўш турган давлат мулки объектлари, 134 та ер участкасига бўлган ҳуқуқ ва суд ҳужжатларини ижро этиш бўйича 58 та объект сотилди. Бу ҳақда Spot хабар берди.

Давлат мулки объектлари

Бошланғич нархи 1 сўм қилиб белгиланган бўш турган 14 та давлат мулки объекти 6 миллиард 300 миллион сўм инвестиция киритиш, 142 та янги иш ўринларини яратиш шарти билан 1 117 миллион сўмга сотилди. Бундан ташқари ушбу ҳафтада республика бўйича 27 та объект сотувга чиқарилди.

Ер участкаларига бўлган ҳуқуқ

Ер ресурслари бўйича электрон онлайн-аукционларда ушбу ҳафтада жами 134 та ер участкасига бўлган ҳуқуқ 122 миллиард 498 миллион инвестиция киритиш ва 790 дан ортиқ янги иш ўринларини яратиш шарти билан 2 миллиард 568,67 миллион сўмга сотилди. Ҳафта давомида 106 та ер участкасига бўлган ҳуқуқ электрон онлайн-аукцион савдоларига чиқарилди.

Суд ҳужжатларини ижро этиш бўйича

Суд ҳужжатлари ва бошқа органлар ҳужжатларини ижро этишда мол-мулкни реализация қилиш бўйича бўлиб ўтган электрон онлайн-аукционларда ушбу ҳафта жами 58 та объект 6 миллиард 643,3 миллион сўмга сотилди. Ҳафта давомида 91 та объект электрон онлайн-аукцион савдоларига чиқарилди.

Дарё ўзанлари тозалаш ҳуқуқи

Ягона электрон савдо майдончасида дарё ўзанларини тозалашга бўлган ҳуқуқ реализациясини амалга ошириш мақсадида 70 та объект савдога чиқарилган. Ушбу объектларнинг 3 таси 892,9 миллион сўмлик бошланғич нарх билан жорий ҳафтада савдога чиқарилди.

Металл қазиб олиш ҳуқуқи

Ҳафта давомида жами 11 та бошланғич нархи 82,5 миллион сўмлик олтин қазиб олиш бўйича участкалар 91,12 миллион сўмга сотилди. Шунингдек, 9 та бошланғич нархи 67,5 миллион сўмлик қимматбаҳо металларни қазиб олиш ҳуқуқи электрон онлайн-аукцион савдоларига чиқарилди.