Мактабгача таълим муассасаларида ёзги соғломлаштириш ойлиги бошланиши муносабати билан Шаҳрисабз шаҳридаги 4 та сектор раҳбари «Беруний» оромгоҳида шаҳар мактабгача таълим муассасаларида тарбияланувчи 300 нафар кўнгли ярим болажонлар учун байрам тадбири ташкил этди. Бу ҳақда «Дарё»га Шаҳрисабз шаҳар мактабгача таълим бўлими мудири Шаҳноза Холмаҳматова хабар бермоқда.
Шаҳноза Холмаҳматованинг сўзларига кўра, шаҳар ҳокимлиги, прокуратура, ИИБ, солиқ инспекцияси, шаҳар Адлия бўлими ва Мактабгача таълим бўлими ҳамкорлигида ташкил этилган «Бахтли болалик» деб номланган байрам тадбирида шаҳар ҳокими Тўлқин Каримов сўз олиб, ёзги соғломлаштириш ойлиги болажонлар учун нақадар аҳамиятли эканлигини таъкидлади. Шунингдек, тадбирда иштирок этаётган мактабгача таълим муассасаларида таълим-тарбия олаётган 300 нафардан ортиқ кам таъминланган оила фарзандларига сектор раҳбарлари, шаҳар Адлия бўлими ҳамда мактабгача таълим бўлими томонидан ташкиллаштирилган совғаларни улашди.
Тадбирда шаҳардаги мавжуд 31 та давлат, 22 та оилавий, 9 та нодавлат ва 2 та давлат хусусий шерикчилик асосида ташкил этилган мактабгача таълим муассасаларининг иқтидорли тарбияланувчилари ҳам иштирок этиб, ўз иқтидорини намоён қилди. Шунингдек тадбирда чиқиш қилган жажжи шифокорлар, ёш рассомлар ва бўлажак спортчилар йиғилганларда катта таассурот қолдирди.
Тадбир сўнгида болажонларга музқаймоқ ва турли ширинликлар улашилди.
Изоҳ (0)