Жиззахда давлат чегарасини бузган шахс уч йилга озодликдан маҳрум қилинди

Жиззахда Ўзбекистон—Қозоғистон чегарасини бузган шахсга нисбатан суд ҳукми ўқилди. Бу ҳақда Жиноят ишлари бўйича Мирзачўл туман суди хабар берди.

Маълум бўлишича, судланувчи С.Ҳамдамов (исм-шарифи ўзгартирилган) Фарғона вилояти, Тошлоқ тумани, «Заркент» маҳалласида яшаб келиб, оилавий яшаш шароити оғирлиги сабабли 2011 йилда ишлаш учун Қозоғистонга чиқиб кетган.

У ерда 8 йил давомида қурилиш ишларида устачилик қилиб, оиласига ишлаган иш ҳақларини мунтазам юбориб турганидан сўнг, уйга қайтишга қарор қилган.

Бироқ паспортини йўқотганлиги сабабли, Ўзбекистон—Қозоғистон чегарасини яширин йўллар билан бузиб, Жиззахнинг Мирзачўл туманига келган ва у ердан ўз уйига Фарғона вилояти, Тошлоқ туманига борган.

Мирзачўл туман ИИБ ходимлари томонидан тезкор қидирув ҳаракатлари давомида чегара бузувчи С.Ҳамдамов эканлиги аниқланган. У Жиноят кодексининг 223-моддаси 1-қисми билан айбланиб, иш судга оширилган.

Суд томонидан С.Ҳамдамовга 3 уч йил муддатга озодликдан маҳрум қилиш жазоси тайинланиб, оилавий шароити ва бошқа ҳолатларни инобатга олиб, Жиноят кодексининг 72-моддасига асосан 1 йил синов муддати белгиланган.