Бугун,

  • USD 11095.31
  • RUB 173.84
  • EUR 10772.44

Бундан сал аввалроқ ижтимоий тармоқларда ёввойи айиққа нисбатан шафқатсизларча муносабатда бўлаётган кишилар суратга олинган видео тарқалди. Сал ўтиб журналист Наргис Қосимова ўзининг Facebook’даги саҳифасида ва ҳатто телеграм каналларида воқеа Қашқадарё вилоятида содир бўлгани, аммо айнан қайси туман эканлиги номаълумлиги ҳақида ёзиб, бунга дарҳол муносабат билдирилиши лозимлиги хусусида бонг ура бошлади. ЎзА воқеага ойдинлик киритиб, ўлдирилган айиқ воқеаси Қашқадарё вилоятининг Чироқчи туманидаги Лангар МФЙ Тутли қишлоғида содир бўлганини ёзди.

Ўлдирилган айиқ.

Ўлдирилган айиқ.
Фото: Telegram

Воқеа тафсилотларини билиш мақсадида «Дарё» мухбири Тутли қишлоғида бўлди.

Тутли қишлоғи.

Тутли қишлоғи.
Фото: «Дарё»

— 28 май куни соат чамаси 9–10 лар атрофида айиқ «Қалқама» сув омборига қуюлувчи «Қўштепа» дарёсидан ўтиб, қўшнимиз Қосим Қиёмовнинг томорқаси орқали бизнинг томорқага ўтган, — дейди хонадонига айиқ кирган Ҳусан Тўраев. – Ўша пайтда оломон йиғилиб келган. Овчи айиққа биринчи ўқни отган-да, айиқ йиқилмаган. Ариққа кириб олган. Иккинчи ўқ пешонасига теккандан сўнг, ўлган. Мен келган пайтда айиқ ўлиб бўлган экан.

Ҳусан Тўраев.

Ҳусан Тўраев.
Фото: «Дарё»

Тутли қишлоғида яшовчиларнинг маълумот беришича, айиқ тепаликдан тушиб келгунга қадар йўлдаги хонадонларга кирган. Хонадон фарзандларини қўрқитган.

— Айиқ ўша хонадон фарзандларига қараб ўкирган ва ёш болаларни қўрқитган, — дейди Ҳусан Тўраев. – Шу боисдан ҳам қишлоқдошларда айиқ қутурган деган тахмин бўлган ва овчи чақириб, айиқни отиб ўлдирган.

Аҳолининг айиқ қутурган дея тахмин қилишига сабаб айиқ қишлоқ аҳолисига кўриниб турувчи тепаликдан тушгунга қадар от ва қорамолларга ҳам таҳдид қилган.

Воқеага гувоҳ бўлган Нуриддин Тўраевнинг айтишича, айиқ уни 15 метргача таъқиб қилиб борган.

Нуриддин Тўраев.

Нуриддин Тўраев.
Фото: «Дарё»

— Айиқ тепаликдан тушаётган пайт томорқада ишлаётгандим, — дейди Нуриддин Тўраев. — Югуриб чиқсам, айиққа рўпара келиб қолдим. Қўрқиб кетиб қочдим. Шунда айиқ мени 15 метргача қувди.

— 28 май куни эрталаб соат 9 да қишлоғимиздаги Сайдулла исмли йигит менга телефон қилиб, қишлоққа айиқ кириб келганини айтди, — дейди «Лангар» МФЙ раиси Усмон Абдураҳмонов. – Айиқ дастлаб, қишлоқ бошидаги Неъмат Ҳусанов хонадонига кириб, болаларини қўрқитган. Сўнгра экинни пайҳон қилиб, қора молларга ҳужум қилган. Бу гапни эшитишим билан айтилган жойга қараб йўл олдим. Воқеа жойига 20 дақиқада етиб бордим.

Усмон Абдураҳмонов.

Усмон Абдураҳмонов.
Фото: «Дарё»

МФЙ раисининг гапига кўра, айиқ Ҳусан Тўраев хонадонида отиб ўлдирилишидан олдин, 10 та хонадон томорқасини пайҳон қилиб, қора молларига ташланган. Буни кўрган овчи Қаҳрамон Сулаймонов эса раисга телефон қилиб, айиқнинг тажовузкорлиги ҳақида хабар берган ва нима қилиши лозимлиги ҳақида сўраган. Раис аввалига айиқни қафасга солиш ёки изига қайтариб юбориш имкони хусусида сўраган. Бунинг имкони йўқлигини эшитгач, вазиятга қараб иш кўришни маслаҳат берган.

Айиқ ошиб келган тепалик.

Айиқ ошиб келган тепалик.
Фото: «Дарё»

Айиқ ошиб келган тепаликнинг бошқа томондан кўриниши.

Айиқ ошиб келган тепаликнинг бошқа томондан кўриниши.
Фото: «Дарё»

Овчи Қаҳрамон Сулаймонов 28 май куни раисга 2 марта қўнғироқ қилган. Эрталаб соат 8 даги биринчи қўнғироғида тоғдаги чўпонлардан қишлоққа айиқ тушиб келаётганини эшитганини айтиб, бирор бир жойдан айиқ қочган ёки қочмаганлигини суриштириб кўришни сўраган.

— Раисга иккинчи маротаба қўнғироқ қилганимда айиқ қишлоққа тушиб келганлигини айтдим, — дейди Қаҳрамон Сулаймонов. — Вазият ёмонлигини, айиқ тажовузкор эканлигини билдирдим. Раис вазият ёмон бўлса, отишимиз мумкинлигини, бу ҳақда туман прокуратурасини огоҳлантирганини айтди.

Қаҳрамон Сулаймонов.

Қаҳрамон Сулаймонов.
Фото: «Дарё»

Қаҳрамон Сулаймоновнинг маълумот беришича, айиқ 3 та ўқдан сўнг ўлган.

Айиқ отиб ўлдирилган ариқ.

Айиқ отиб ўлдирилган ариқ.
Фото: «Дарё»

«Лангар» МФЙ раисининг қўшимча қилишича, айиқ дарё бўйига келганда шу қишлоқда яшовчи Рашид Усмоновнинг келини Сабогул Абдураимова дарё бўйида бўлган, келинчак айиқдан қўрқиб, қочаман деб йиқилиб тушган. Оқибатда келинчакнинг ҳомиласи тушган. Қолаверса, шу қишлоқда яшовчи ёш бола ҳам унга қараб ўкирган айиқдан қочаман дея йиқилиб тушиб, қўлини синдирган.

Фото: «Дарё»

Туман тиббиёт бирлашманинг 3 июнь кунидаги туғруқ бўлими навбатчи ҳамшираси Инобат Бозорованинг маълумот беришича, 28-,29- ва 30 май кунлари Сабогул Абдураимова исмли бемор бўлимга мурожаат қилмаган. Жавоҳир Саидаҳмедов исмли бола эса ўша куни ҳақиқатдан ҳам қўли синиб, туман тиббиёт бирлашмага мурожаат қилган. Айни кунда бемор шифохонада.

Овчи Қаҳрамон Сулаймоновнинг қўшимча қилишича, ўша куни айиқ ўлгач, ҳайвон ўлигини таҳқирлаб расмга тушган икки киши ақлан заиф ва соқов бўлган.

Қашқадарё вилоят ҳайвонлар касалликлари ташҳиси ва озиқ-овқат маҳсулотлари хавфсизлиги давлат маркази директорининг «Дарё»га маълумот беришича, отиб ўлдирилган айиқ 5 ёшда бўлган. Айиқ 2019 йил 1 июнь куни экспертиза текширувидан ўтказилган. Дастлабки микроскопик текширувда қутуриш касаллигини тасдиқловчи Бабеш Негри таначалари топилмаган. Мутахассисларнинг айтишича, лаборатория оқ сичқонларига биосинама қўйилган бўлиб, натижа 30 кунда маълум бўлади.

Изоҳ
Асосий янгиликлар
Маҳаллий
«Одамлар ўлимида ўзимни айбдор ҳисобламайман» — Нукусдаги тартибсизликлар етакчиси Даулетмурат Тажимуратов
Маданият
«Худодан қўрқмаган одамдан қўрқдим». Ўзбекистон халқ артисти Бобомурод Ҳамдамов оилавий низолар туфайли ижара уйда яшамоқда (видео)
Спорт
Ўзбекистон ампутантлар терма жамоаси футболчиларига Cobalt автомобиллари топширилди