Норматив-ҳуқуқий ҳужжатлар лойиҳалари муҳокамаси порталида Вазирлар Маҳкамасининг «Андижон вилоятида ёшларни маданият ва санъат муассасаларига кенг жалб этиш орқали уларнинг бўш вақтларини мазмунли ташкил қилиш тизимини янада ривожлантириш тўғрисида»ги қарори лойиҳаси жойлаштирилди.
Ҳужжат билан қуйидагилар:
7 ёшдан 30 ёшгача бўлган ёшларнинг камида 20 фоизи (256,1 минг нафари)ни маданият ва санъатга кенг жалб этишни назарда тутувчи Андижон вилояти ёшларини маданият ва санъат муассасаларига ҳамда умумтаълим муассасаларида ташкил этиладиган тўгараклар ва бошқа маданий тадбирларга кенг жалб этиш ва уларнинг бўш вақтларини мазмунли ташкил қилиш бўйича «Йўл харита»си;
«Йўл харита»сида белгиланган чора-тадбирлар амалга оширилишини ташкиллаштириш ва назоратини олиб бориш бўйича ишчи гуруҳининг таркиби;
ёшларни маданият ва санъатга кенг жалб этиш борасидаги барча мавжуд имкониятлардан тўлиқ ва самарали фойдаланиш ҳамда умумтаълим мактаблари ҳамда уларга туташ ҳудуддаги маҳалла ёшларини маданият ва санъатга кенг жалб этиш, дарсдан бўш вақтларини мазмунли ўтказиш мақсадида маданият ва санъат йўналишидаги тўгараклар ташкил этиладиган маданият муассасалари рўйхати, умумтаълим мактабларидаги тўгараклар рўйхати;
Андижон вилояти туман (шаҳар) ҳокимларига маданият ва санъат масалалари бўйича бириктирилган ижодий маслаҳатчилар рўйхати;
маданият ва санъат ҳамда умумтаълим муассасаларида тўгаракларни мазмунли ташкил этилишини таъминлаш мақсадида мусиқа чолғулари ва бошқа жиҳозлар билан таъминланадиган муассасалар рўйхати;
вилоятдаги умумтаълим мактабларининг маданият ва санъат йўналишидаги тўгарак раҳбарлари ва ўқитувчиларининг малака оширишга жалб этиш режаси тасдиқланади.
Белгиланишича, «Йўл харитаси»га мувофиқ ёшларни маданият ва санъатга кенг жалб этиш, уларнинг бўш вақтларини мазмунли ташкил этиш ишларини амалга оширишда биринчи навбатда умумтаълим мактаблари имкониятларидан кенг фойдаланилади.
Ўзбекистон Республикаси Маданият вазирлиги, Халқ таълими вазирлиги, Андижон вилояти ҳокимлиги билан биргаликда вилоятдаги умумтаълим мактабларининг маданият ва санъат йўналишидаги тўгарак раҳбарлари ва ўқитувчиларининг малака ошириш курсларини Андижон ихтисослаштирилган санъат мактабида ташкил этиш чораларини кўради;
малака ошириш курсларида машғулот ўтказиш учун соҳанинг малакали, етук мутахассис ва ўқитувчилари жалб этилади ҳамда уларнинг ойлик маошлари ўрнатилган тартибда бюджет маблағлари ҳисобидан қопланади.
Ўзбекистон Республикаси Маданият вазирлиги, Халқ таълими вазирлиги, Молия вазирлиги ва Андижон вилояти ҳокимлигининг вилоятдаги маданият марказларида ҳамда умумтаълим мактабларида ёшларни бўш вақтларини мазмунли ўтказиш мақсадида пуллик тўгараклар ташкил этиш ҳамда тўгаракларнинг тўлов миқдори Андижон вилоятидаги шаҳарларда камида 15 000 (ўн беш минг) сўм туманларда камида 10 000 (ўн минг) сўм этиб белгилаш тўғрисидаги таклифига розилик берилади;
пуллик тўгаракларга жалб этилган икки ва ундан ортиқ фарзанди бўлган оилалар фарзандлари, жисмоний имконияти чекланган ўқувчилар учун давлат ижтимоий соҳа муассасаларида ташкил этилган ҳақ тўланадиган машғулотларга доимий қатнаган тақдирда машғулотлар учун белгиланган тўлов миқдорининг уларнинг ҳар бирига 50 фоиз миқдорида имтиёзлар белгилаш;
маданият ва санъат муассасаларида бадиий жамоалар, халқ ижодиётига хос тўгараклар фаолиятини кенг йўлга қўйиш, илмий-методик жиҳатдан мувофиқлаштириш мақсадида Маданият вазирлиги тизимидаги Республика маданият муассасалари фаолиятини ташкил этиш илмий методик маркази негизида Республика халқ ижодиёти илмий-методик маркази ҳамда Қорақалпоғистон Республикаси, Тошкент шаҳри ва вилоятларда халқ ижодиёти методик марказларининг ҳудудий бўлимларини ташкил этиш тўғрисидаги таклифига розилик берилади;
Ўзбекистон Республикаси Маданият вазирлиги Республика халқ ижодиёти илмий-методик маркази ҳамда Қорақалпоғистон Республикаси, Тошкент шаҳри ва вилоятларда халқ ижодиёти методик марказларининг ҳудудий бўлимларини ташкил этиш тўғрисида Ҳукумат қарорини киритади.
Ўзбекистон Республикаси Маданият вазирлиги, Ўзбекистон театр арбоблари уюшмаси, Ўзбекистон кино арбоблари ижодий уюшмаси, Ўзбекистон Рассомлар ижодий бирлашмаси, Ўзбекистон халқ артистлари клуби ва «Ўзбекистон темир йўллари» акциядорлик жамиятининг:
«Ўзбекистон халқ артисти», «Ўзбекистон халқ рассоми», «Ўзбекистон Республикаси санъат арбоби», «Ўзбекистонда хизмат кўрсатган артист», Ўзбекистонда хизмат кўрсатган маданият ходими фахрий унвонларига эга санъаткорлар, ижодкорлар ва маданият ходимлари, «Ниҳол» мукофоти совриндорларини Андижон вилояти туман (шаҳар)лари ҳокимларига маданият ва санъат масалалари бўйича ижодий маслаҳатчи сифатида жамоатчилик асосида бириктириш;
ижодий маслаҳатчиларни ҳар ойда бир маротаба жойларга хизмат сафарга бориб-келиши учун бепул темирйўл чипталари билан таъминлаш тўғрисидаги таклифларига розилик берилади.
Туман (шаҳар) ҳокимликлари маслаҳатчи сифатида бириктирилган санъаткорлар, ижодкорлар ва малакали мутахассислар билан фаол ҳамкорликни йўлга қўяди ҳамда уларнинг жойларда самарали фаолият юритишлари учун етарли шарт-шароит яратади.
Ўзбекистон Республикаси Маданият вазирига зарурат тақозосига кўра туман (шаҳар) ҳокимларига маданият ва санъат масалалари бўйича ижодий маслаҳатчи сифатида бириктирилган ижодкорлар рўйхатига тегишли ўзгартириш киритиш ҳуқуқи берилади.
Ўзбекистон Республикаси Маданият вазирлиги манфаатдор вазирлик ва идоралар, Андижон вилояти ҳокимлиги билан биргаликда:
2019 йил якунига қадар ҳар бир туман (шаҳар) марказининг маданият марказида (ёки умумтаълим мактабида) биттадан ҳаваскор театр жамоаси, вокал чолғу ансамбли, ашула ва рақс ансамбли ҳамда намунавий болалар ансамблини ташкил этади.
Ўзбекистон Республикаси Маданият вазирлигига махсус олий ёки ўрта махсус маълумотга эга бўлмаган тажрибали мутахассисларни болалар мусиқа ва санъат мактабларида ҳамда маданият марказларида тўгарак ва машғулотлар ўташга жалб этиш ҳуқуқи берилади.
Ўзбекистон Республикаси Олий ва ўрта махсус таълим вазирлиги, Маданият вазирлиги билан биргаликда вилоят болалар мусиқа ва санъат мактабларида фаолият юритаётган ўрта-махсус маълумотли ўқитувчиларни 2019 йилдан бошлаб ҳар йили (25-30 нафардан) босқичма-босқич Андижон давлат университети сиртқи (махсус сиртқи) бўлимининг «Мусиқий таълим» йўналиши бўйича қабул квотасидан келиб чиққан ҳолда ўқитишни амалга оширади.
Ўзбекистон Республикаси Маданият вазирлиги, Халқ таълими вазирлиги, Андижон вилояти ҳокимлиги билан биргаликда, ёшларни маданият ва санъатга кенг жалб этиш борасидаги барча мавжуд имкониятлардан самарали ва тўлиқ фойдаланиш ҳамда умумтаълим мактаблари ўқувчи-ёшлари ҳамда уларга туташ ҳудуддаги маҳалла ёшларини маданият ва санъатга кенг жалб этиш, дарсдан ва бошқа фаолият турларидан бўш вақтларини мазмунли ўтказиш мақсадида вилоятдаги 741 та умумтаълим мактабларида маданият ва санъатнинг ёшлар қизиққан турлари бўйича тўгараклар фаолиятини йўлга қўяди.
Бунда:
Маданият вазирлиги тўгараклар фаолиятини ташкил этиш, тўгаракларни тегишли кадрлар билан таъминлаш, умумтаълим мактабларида турли тадбирлар, кўрик-танловлар ўтказиш, уларнинг мазмундорлигини таъминлаш бўйича;
Халқ таълими вазирлиги тўгараклар фаолият юритиши, тадбирлар ўтказилиши учун зарур бўладиган синфхоналар ажратиш ва тегишли шарт-шароит яратиш, уларга ўқувчи-ёшлар қатновини таъминлаш бўйича;
Молия вазирлиги ҳамда Андижон вилояти ҳокимлиги умумтаълим мактабларида тўгараклар ташкил этиш учун зарур бўладиган мусиқа чолғулари, ўқув қўлланма ҳамда ноталар, шунингдек, мактабларнинг жиҳозлаш меъёрлари асосида бошқа инвентарларни маҳаллий бюджет маблағлари ҳисобидан молиялаштирилишини таъминлаш бўйича масъул этиб белгиланади.
Ўзбекистон Республикаси Молия вазирлиги Маданият вазирлигининг таклифлари асосида умумтаълим мактаблари учун зарур бўладиган мусиқа чолғулари ва бошқа инвентарларни харид қилиниши ҳамда тўгараклар фаолиятини олиб борадиган кадрлар учун тегишли ойлик маош тўланиши масалаларини ҳал этади.
Ўзбекистон Республикаси Халқ таълими вазирлиги, Маданият вазирлиги, Молия вазирлиги, Андижон вилояти ҳокимлиги билан биргаликда умумтаълим мактабларида ташкил этиладиган тўгаракларнинг тўлов миқдорини ва тўгарак машғулотларини олиб борувчи кадрларга қўшимча иш хақини тўлаш тартибини ишлаб чиқиб, тасдиқлайди.
Ўзбекистон Республикаси «Ўзбеккино» миллий агентлиги, Маданият вазирлиги, Молия вазирлиги умумтаълим мактаблари фаоллар зали ва маданият марказларида ёшларни Ватанпарварлик, миллий ғояга садоқат, меҳр-оқибат, илм-фанга ошно бўлиш ва бошқа тарбиявий руҳни ўзида мужассам этган кинофильмлар намойишларини ташкил қилинишини таъминлайди.
Изоҳ (0)