4 июндан бошлаб Товар-хом ашё биржасида чиройли сонлар комбинациясига эга уяли телефон рақамларини сотиш бўйича янги савдо платформаси ва mobilraqam.uzex.uz вебсайти тест режимида ишга туширилди. Бу ҳақда Spot хабар беради.
Аукцион предмети деб, сонларнинг чиройли комбинациясига эга абонентнинг уяли телефон рақамидан фойдаланиш ҳуқуқини сотиб олиш белгиланган.
Ҳар бир лотнинг спецификацияси ва сотувга қўйилаётган ҳар бир рақамнинг тафсилотлари сотувчи томонидан белгиланади. Шу билан бирга, иштирокчиларнинг тоифаси (юридик ёки жисмоний шахс), сонларнинг чиройли комбинациясига эга абонентнинг уяли телефон рақами, лотнинг бошланғич нархи ва рақобатли тартиботнинг якунлаш муддати аниқ кўрсатилиши шарт.
Аукцион онлайн-режимда бошланғич нархларни кўтарилиш тартибида буюртмалар берилган пайтдан бошлаб камида икки иш куни муддати давомида ўтказилади. Савдо жараёнида харидорлар энг яхши нархдан юқори даражадаги чекланмаган миқдорда таклифларини беришлари мумкин. Берилган ҳар бир янги нарх таклифи аукционни қўшимча 10 дақиқага узайтиради. Бир вақтнинг ўзида сотувчи кимошди аукцион муддатини узайтиришга ҳақлидир.
Ўз навбатида, савдо иштирокчилари аукционлар ўтказилаётган пайтда келиб тушаётган барча нарх бўйича таклифларни эркин кузатиб боришлари мумкин. Энг юқори нарх берган харидор электрон тизим томонидан автоматик тарзда аниқланади ва савдо ғолиби сифатида белгиланади.
Аукцион якунланганидан сўнг, биржанинг ахборот тизими тузилган битимни рўйхатга олади ва харидордан комиссия тўловини ечиб олади. Биржа хизмати учун тўланадиган комиссион йиғим тузилган битим нархидан 3% миқдорида белгиланган.
Молиявий мажбуриятлар тўлиқ қопланган санадан бошлаб 10 кун мобайнида расмийлаштириш харидорнинг айби билан таъминланмаган тақдирда, тузилган битим қийматидан 50% миқдорида шартнома мажбуриятлари бажармаганлик учун жаримага тортилади, қолган қисми эса харидорга қайтарилади.
Изоҳ (0)