Калифорниянинг ёввойи табиат хизмати вакиллари 27 май куни Сан-Диего каньонида тўрт ёшли болага ташланган пумани ўлдирди. Бу ҳақда Forum Daily хабар берди.
Маълум бўлишича, бола сафарга чиққан яна 10 нафар одам билан Каньон Лос-Пеньяскитос қўриқхонасида кетаётганида пума тўсатдан ҳужум қилган. Гувоҳларнинг сўзларига кўра, боланинг отаси ҳайвонни ўғлидан чалғитиш мақсадида пумани тепиб, унга тош отган. Ҳужумга айнан нима сабаб бўлгани ноаниқлигича қолмоқда.
Воқеа жойига Калифорния штати Балиқ ва ёввойи табиат хўжалиги департаменти етиб келган. Пума одамлардан қўрқмаган ва офицерлардан бирига яқинлашаётган пайтда ўлдирилган.
«Афтидан, пума одамлардан қўрқмаган. Бу пумаларга хос бўлмаган ҳолатдир», — деган департамент вакили.
Сан-Диего ёнғин-қутқарув хизмати ходимлари ҳаёт учун хавфли бўлмаган жароҳат олган болани касалхонага етказган.
Изоҳ (0)