26 май куни Германиянинг айрим вилоятларида ҳудудий сайловлар бўлиб ўтди. Уларнинг якуний натижасига кўра, Кирххаймболанден шаҳри маҳаллий кенгашига 100 ёшли собиқ ўқитувчи Лизель Хайзе депутат этиб сайланди, деб хабар беради DW.
Лизель 911 та овоз тўплаб «Биз Кибо учун» фуқаролик ташаббуси томонидан шаҳар кенгашининг иккита депутатидан бирига айланди. Шаҳарда жами 7,8 минг киши истиқомат қилади.
Лизель Хайзе узоқ йиллардан буён қаровсиз қолиб келаётган бассейнни қайта очилишига эришиш учун сиёсатга кириб келган. Унинг айтишича, бассейн унинг учун «ёшлик элексири» бўлиб хизмат қилган.
80 йил олдин Лизель Хайзенинг отаси ҳам Кирххаймболанден шаҳри кенгаши аъзоси бўлган. 1938 йилда маҳаллий синагоганинг бузилишига қарши чиққани сабаб ҳибсга олинган. Дўстларининг ёрдами билан конслагерга жўнатилишдан омон қолган. Лизелнинг ўзи эса анъанавий сиёсий партияларга у қадар ишонч билдирмайди.
«Мен учун муваффақият эмас, бажарган амали муҳим. Кучинг бор экан, овоз беришинг керак», — дейди 100 ёшни қаршилаган аёл.
Изоҳ (0)