Самарқанд вилояти ҳокими ўринбосари Рустам Қобилов Facebook’даги саҳифасида соқол ҳақида қолдирган хабарининг динга алоқаси йўқлигини маълум қилди, дея хабар бермоқда «Дарё» мухбири Мусулмонбек Иброҳимов.
Қобилов 25 апрель куни Facebook’даги шахсий саҳифасида шундай хабар қолдирган (кейинроқ уни ўчириб юборган): «Айрим кинолар ёшлар тарбиясига тескари (салбий) таъсир кўрсатмоқда. Соқол қўйган йигитлар, тунги клуб ва кўнгилочар жойлар акс этган кадрлар тўла. Бундай кино ишлашдан мақсад нима? Тарбиями ёки фойда?».
Вилоят ҳокими ўринбосарининг ушбу пости ижтимоий тармоқларда маълум бир шов-шувга сабаб бўлди: унинг фикрини маъқуллаганлар ҳам, «ҳокимликда соқолга осилишдан бошқа муҳимроқ ишинг йўқми?» қабилида танқидий ва норози фикрлар ҳам билдирилди. Қобилов уларнинг ҳар бирига жавоб беришга уринган, лекин бунга «кучи етмагани»ни тан олди.
«Ҳайкалларга қаранг — Алишер Навоий, Амир Темур боболаримиз соқол қўйиб турибди. Сиз ҳам боболар ёшига етинг, шундан сўнг чиройли қилиб соқол қўяверинг, деб жавоб бердим уларга. Лекин бир ўзимнинг кучим етмади. Тарафимни олиб изоҳ ёзганлар ҳам бўлди. Билганим, менга қарши изоҳ ёзганларнинг аксари ўз саҳифасига соқол билан тушган расмини жойлаган», — деди Самарқанд вилояти ҳокими ўринбосари.
Қобиловнинг айтишича, у «соқол модаси» Туркия кино ва сериаллари таъсирида пайдо бўлаётганига эътибор қаратмоқчи бўлган, бироқ у қолдирган хабардаги гаплар жамоатчиликнинг айрим вакиллари томонидан нотўғри талқин қилинган. «Фикр билдириб, балога қолдим. Ислом дини ҳақида изоҳ қолдиришга хоҳишим ҳам бўлмаган», — деди у.
«Биз соқол қўйишни турк сериаллари, киноларидан ўргандик. Ўша киноларни эрмакка, бекорчиликдан, ҳою ҳавасга кўрдик. Натижада соқол қўйиш онгимизга сингди. Масалан, турк актёри Бурак Ўзчивит Тошкентга келганида бир тўда қизлар унинг орқасидан югуриб юрди. Мана, соқол қўйиб юрганни ҳою ҳаваси, аҳволи шуми — кинолар берган тарбиянинг мевасини кўрдик. Шунинг учун, бу ҳақда ёзишга мажбур бўлгандим», — дея қўшимча қилди ҳоким ўринбосари.
Изоҳ (0)