Caravan Group асосчиси Тимур Мусин матбуот анжуманини ўтказишга ваъда берди, деб хабар берди Spot. Аввалроқ унга қарашли иккита бино (Chelsea паби ва Cinara‘s ресторани) Яккасарой тумани МИБ томонидан аукцион савдоларига қўйилган эди.
«Эртага бу масалага масъул бўлганларнинг барчасини таклиф қиламан ва матбуот анжуманида содир бўлган бутун жараёнларни асослаб беришни сўрайман. Шу билан бирга, раҳбарларнинг ўз қўл остидагиларга масъулияти, қонун ва унга амал қилиш бўйича билимларни жамоатчиликка етказамиз», — деган Мусин ўзининг Facebook’даги саҳифасида.
Тадбиркорнинг ёзишича, ҳозирда Ўзбекистонда тадбиркорликни бир синф сифатида ҳақиқатан ҳам ривожлантириш истагида бўлган Президент ва бизнес ўртасида катта қатлам бор.
«Мана шу ишёқмас қатламни жавобгарликка тортамиз. Биз бу коррупциячилар, популистлар, ишёқмаслар, дилетантлар ва бошқа шу каби шахсларни олиб ташламасак, мамлакатда ҳеч нарса ўзгармайди. Биз 25 йил давомида қўрқиб яшашдан чарчадик. Менимча, энди ҳақиқат учун очиқчасига курашиш мумкин!» — деган Мусин.
У, шунингдек, ҳеч қаерга кетмаганини, лекин энди ресторанларни мамлакат ташқарисида ривожлантиришини, чунки «бу ерда иш ўрнини ҳам, сайёҳлик инфраструктурасини яратиш керак эмас»лигини айтган.
Тимур Мусин — машҳур пойтахтлик ресторан бошқарувчиси. М.В. Ломoносов номидаги Москва Давлат университетининг муниципал ва давлат бошқаруви факультетини тамомлаган. Социология фанлари номзоди. Caravan Group ресторанлар тизимининг катта бошқарувчи ходими. Ўзбекистон Рестораторлар ассоциацияси раиси.
Изоҳ (0)