27 май куни ижтимоий тармоқларда «Вақф» фонди ҳақида асоссиз гаплар тарқалди. Уларда вақф мулклари сифатида ўтказиб берилган хонадонларда Фонд раҳбари яшаётгани иддао қилинган. Бу ҳақда фонд матбуот хизмати маълум қилди.
Facebook ижтимоий тармоғида «Саидқосим Бухорий» номли блоггер ўзининг профилида «Мажбур бўляпман дўстларим. (Рамазон ойи Аллоҳ ўзи кечирсин)» сарлавҳали ёзувларни эълон қилинди. Гўё вақф мулки сифатида ажратилган хонадонда Фонд раҳбарининг ўзи яшаётган эмиш.
Қуйида фонд матбуот хизмати асл воқелик қандай бўлганини баён қилади.
Биринчидан, шу йилнинг 18 март куни пойтахтнинг Шайхонтоҳур тумани «Оқлон» маҳалласидаги саккизта хонадонда кучли ёнғин бўлиб, уйларнинг ҳаммаси барча жиҳозлари билан ёниб кетган эди. Ўзбекистон мусулмонлари идораси ташаббуси билан ушбу хонадонларга имом-хатиблар ўша заҳотиёқ ёрдам кўрсатди. Шу кунларда ҳам ёнғин бўлган хонадонларни қайта қуриш ишлари амалга оширилмоқда. Ушбу хонадон аҳлларидан бирлари: «Энг ачинарлиси, мен учун бебаҳо бойлик бўлган кўплаб китобларим ҳам ёнғинда ёниб кетди. Уларнинг аксарияти диний китоблар эди», дея афсус билан сўзлаб берган эди.
Шунинг учун Ўзбекистон мусулмонлари идораси томонидан саккизта хонадоннинг ҳар бирига Қуръони карим ва ўндан ортиқ, жами юзга яқин диний-маърифий китоблар топширилди ҳамда бир неча юз миллион сўмлик қурилиш материаллар хайрия қилинди.
Иккинчидан, «Саидқосим Бухорий» Фонд раҳбари вақф мулки сифатида берилган уйда яшаётганини ўз кўзи билан кўрганини иддао қилган. Ваҳоланки, Фонд раҳбари бирор марта ҳам ушбу хонадонга бормаган, ушбу хонадон Фонд масъул ходимлари томонидан вақф мулки сифатида тасарруф этилмоқда. «Саидқосим Бухорий» айтганидек, уйи ёниб кетган ёки уйсизларга бериб бўлмайди. Чунки вақф мулки ҳадя этиладиган нарса эмас. У бир умр вақф тасарруфида қоладиган мулк.
Учинчидан, «Саидқосим Бухорий» Фондда меҳнат қилаётган мутахассис Шайх Муҳаммад исмли ходим билан гаплашганини ёзган. Шайх Муҳаммаднинг ўзи бундай инсон билан мутлақо гаплашмаганини таъкидлади. Демак, «Саидқосим Бухорий»нинг бу гапи ҳам ёлғон.
Тўртинчидан, блоггер холис бўлганида эди, Фонд томонидан Тошкент шаҳрида бир нечта ва вилоятларда ўнлаб фуқароларга уй-жой қуриб берилганини эътироф этар эди. Шунингдек, сел ювиб кетган Қашқадарё вилоятидаги хонадонларга ёрдам берилганини билар эди. Демакки, «Саидқосим Бухорий» ушбу мавзуда ҳам нохолисдир.
Баён этилганлардан маълум бўладики, «Саидқосим Бухорий»нинг хатти-ҳаракатлари «Вақф» фонди ҳақида етарлича маълумотга эга бўлмай туриб, туҳмат ва бўҳтон қилиб, фитна қўзғашдан бошқа нарса эмас.
Изоҳ (0)