Бухоро ёшлар марказида Ўзбекистон ва Исроил давлати ўртасида савдо-иқтисодий, инвестициявий, маданий-гуманитар соҳаларни мустаҳкамлаш мақсадида Ўзбекистон–Исроил агробизнес форуми бўлиб ўтди. Бу ҳақда Бухоро вилояти ҳокимлиги матбуоти хизмати хабар берди.
Мазкур форум «Фаол инвестициялар ва ижтимоий ривожланиш йили» Давлат дастурида белгиланган тадбирлар доирасида Бухоро вилояти ҳокимлиги, Ўзбекистон Ташқи ишлар вазирлиги, Инвестициялар ва ташқи савдо вазирлиги ва вилоят Савдо-саноат бошқармаси ҳамкорлигида ташкил этилган. Бунда Исроил давлатининг Ўзбекистондаги элчиси Эдуард Шапира, қишлоқ хўжалиги вазирлиги ҳузуридаги агроинновация маркази бош директори ўринбосари, доктор Михел Леви ҳамда 20 дан зиёд делегация аъзолари ташриф буюрган.
Бухорода Хитой, Бирлашган Араб Амирликлари, Туркия, Ироқ, Иордания, Эрон, Жанубий Корея, Италия, Россия ва бошқа мамлакатлар қатори Исроил давлати билан ҳам вилоятга тўғридан-тўғри хорижий инвестицияларни жалб қилиш борасида ҳамкорлик йўлга қўйилган.
— Бухорода агроиқтисодиёт ва инвестиция салоҳиятининг ўсиб боришида халқаро форумлар муҳим аҳамият касб этмоқда. Аграр соҳада вилоятда йилига 320 минг тонна пахта, 450 минг тонна ғалла, 2 минг тонна пилла, 1,2 миллион тонна мева-сабзавот ва 150 минг тоннадан зиёд полиз маҳсулотлари етиштирилади. Шунингдек, 240 минг тонна гўшт, 950 минг тонна сут, 4 минг тонна қўй жуни, 440 минг дона қоракўл тери, 7 минг тонна балиқ, 4,4 миллион бош парранда ва 436 миллион дона тухум каби маҳсулотлар етиштирилади ва тайёрланади. Бироқ ушбу маҳсулотларни қайта ишлаш ва эскпортини самарали йўлга қўйиш учун, аввало, юқори сифатли технологияларга эҳтиёж катта. Бу борада Исроил давлати билан ҳамкорлигимиз муносиб натижа бериши, шубҳасиз, — деди Бухоро вилояти ҳокими Ўктам Барноев.
«Бухоро-Агро» эркин иқтисодий зонасида 3,3 минг гектар ер майдонда замонавий технологиялар асосида иссиқхоналар қуриш ишлари бошланган. Бир минг гектарга яқин майдон 143 та лойиҳа бўйича 450 миллион доллар қийматидаги инвестицияларни йўналтириш мақсадида тадбиркорларга берилган. Бундан ташқари, Бухоро туманида Туркиянинг «Варнет» компанияси томонидан 100 миллион долларга яқин хорижий инвестиция йўналтирилган. 32 гектар ерда ойнаванд иссиқхона барпо этиш ишлари бошланган.
Форумда 100 дан зиёд тадбиркор ва ишбилармонлар иштирок этган.
Изоҳ (0)