Шавкат Мирзиёев ва Германия президенти Франк-Вальтер Штайнмайер тор доирада ва кенгайтирилган таркибда музокаралар ўтказди. Бу ҳақда Президент матбуот хизмати маълум қилди.
Давлат раҳбари учрашув аввалида Германия президенти ва халқини ГФР ташкил топгани ҳамда конституцияси қабул қилинганининг 70 йиллиги муносабати билан табриклади.
Франк-Вальтер Штайнмайер Шавкат Мирзиёевга Ўзбекистонга ташриф билан келиш таклифи ва кўрсатилаётган самимий меҳмондўстлик учун миннатдорлик билдирди.
Музокараларда сиёсий, савдо-иқтисодий, инвестициявий, молиявий-техник ва маданий-гуманитар ҳамкорликни янада ривожлантириш масалалари батафсил муҳокама қилинди. Халқаро ва минтақавий аҳамиятга молик муаммолар кўриб чиқилди.
Мулоқотда томонлар халқаро ташкилотлар доирасида бир-бирини қўллаб-қувватлашда давом этишини билдирди. Ўзбекистон — Европа Иттифоқи формати доирасидаги алоқаларни ривожлантириш масалалари ҳам муҳокама қилинди.
Терроризм ва экстремизмга қарши курашиш, хавфсизлик соҳасида ҳамкорликни мустаҳкамлаш масалалари кўриб чиқилди. Президентлар Афғонистонда ижтимоий-иқтисодий, инвестициявий ва инфратузилмавий лойиҳаларни амалга ошириш мақсадида Ўзбекистон—Германия маслаҳатлашувлари механизмининг йўлга қўйилишини маъқуллади.
Музокараларда Ўзбекистон ва Германиянинг кенг кўламли ҳамкорликни ривожлантиришга интилиши, барча масалалар бўйича қарашлари ўхшаш ва яқинлиги яна бир бор ўз тасдиғини топди.
Изоҳ (0)