Жорий йилда барча ОТМларга ҳужжатлар давлат хизматлари маркази ҳамда Ягона портал орқали қабул қилиниши, энди абитуриентлар ОТМга бориши шарт эмаслиги, ўз туманида ҳам ҳужжат топшира олиши ҳақида кўп бор таъкидланганди. Бу ҳақда Хушнудбек Худойбердиев эслатмоқда.
Буни DTМ ҳам, Олий ва ўрта махсус таълим вазирлиги ҳам, Давлат хизматлари агентлиги мутасаддилари ҳам билдирган. Лекин айтишларича, бугунги кунга келиб вазият ўзгарган. Яна ҳам аниқроғи, тестга оид қарор сўнгги лаҳзаларда лойиҳадагидан бироз фарқлироқ бўлиб қабул қилинган.
Яъни қарорга мувофиқ, фақат Давлат қабул комиссияси томонидан белгиланадиган давлат ОТМларидагина ҳужжатлар ДХМ ёки Ягона портал орқали қабул қилиниши назарда тутилган.
Ҳозирча тасдиқланмаган маълумотларга кўра, Давлат қабул комиссия бармоқ билан санарли ОТМларнигина рўйхатга киритаётган экан. Бу дегани саноқли ОТМларни ҳисобга олмаганда, барча жойда яна ўтган йиллардагидек ҳужжатлар ОТМларнинг ўзида қабул қилинади.
Давлат хизматлари маркази катта ҳажмни эплай олмайди, деган хулосага келинган шекилли.
Шу ўринда кўплаб саволлар пайдо бўлади:
Агар абитуриент танламоқчи бўлган 3 та ОТМ ҳам махсус рўйхатда бўлмаса, унда учала ОТМга бориб ҳужжат топшириб чиқиш керакми?
ОТМларда ҳужжат қабул қилинганда расм, конверт, скоросшивател папка сўрашмайдими?
Ҳужжатларни аввалги йиллардагидек олиб қолишадими ёки қайтариб беришадими?
Рўйхатда йўқ ОТМлар учун онлайн ҳужжат топшириш мумкин бўладими?
Хуллас, бунақа саволлар кўп, лекин ҳозирча жавоб йўқ. Масъул ташкилотлар фақат «кутиб туринг, тез орада ҳужжат қабул қилинади, кейин маълум бўлади» дейишдан нарига ўтмаяпти. Қабулгача атиги ярим ой вақт қолди, лекин деярли ҳея нарса аниқ эмас.
Изоҳ (0)