Жаҳон банки Ўзбекистоннинг иккита ҳудудида сут ишлаб чиқаришни ривожлантириш лойиҳасини амалга оширади, бу ҳақда ЎзА хабар қилади.
Шу кунларда мавжуд чорва молларининг электрон базасини яратиш, яъни уларни идентификация қилиш ишлари олиб борилмоқда. Натижада ҳар бир чорва бўйича тўлиқ маълумотларнинг электрон тизими яратилади. Тизим туман босқичидан бошлаб вилоят ва республика миқёсида назоратга олинади.
Унда чорва ҳайвонларининг соғлиги, ёши, улар нима билан озиқланиши, қандай касалликларга қарши даволангани, эмлангани, қанча туққанлиги каби барча маълумотлар жамланади. Балки, бу орқали чорва молларини йўқолиши каби ҳолатларга ҳам чек қўйилар.
Шу ва бошқа бир қатор масалалар ҳақида Ўзбекистон ветеринария ва чорвачиликни ривожлантириш давлат қўмитасида халқаро молия институтлари, хусусан Жаҳон банки, Европа Иттифоқи, Франция ривожлантириш агентлиги, Осиё Тараққиёт Банки вакиллари иштирокида «Ўзбекистон Республикасида чорвачилик тармоғини ривожлантириш» лойиҳаси доирасида ўтказилган давра суҳбатида сўз юритилди.
«Европа Иттифоқи қишлоқ хўжалиги йўналишида бир қатор янгиликларни жорий этишда ўз ҳиссасини қўшмоқда. Таъкидлаш жоизки, чорвачиликни ривожлантириш, ветеринария хизматларини янада юксалтириш келгусида Ўзбекистон фуқароларини соғлом ва экологик тоза озиқ-овқат маҳсулотлари билан таъминлаш ва экспорт ҳажмини оширишга замин яратади. Шу мақсадда Жаҳон банки иккита ҳудудда сут ишлаб чиқаришни ривожлантириш лойиҳасини амалга оширмоқда. Хусусан, Андижон давлат университети қошида фермер ва ўқитувчиларга янги технологияларни ўргатиш, малака ошириш курслари йўлга қўйилса, Сурхондарёда сут йиғиш маркази ташкил қилинади. Бунда нафақат шу ҳудуддаги сутни йиғиб олиш ва сотиш, балки уни қайта ишлаш имкони ҳам яратилади. Бу борада доимий ҳамкорликда ишлаш режамиз бор», — дейди халқаро консултант, Европа иттифоқи делегациясининг Ўзбекистон Республикасида қишлоқ хўжалигини ривожлантириш масалалари бўйича менежери Жан Луи Во.
Жаҳон банкининг «Ўзбекистон Республикаси чорвачилик тармоғини ривожлантириш» лойиҳаси доирасида Халқаро эпизоотик Бюронинг консултантлари билан ҳамкорликда ветеринария хизматини халқаро стандартларга мослаштириш учун зарур асбоб-ускуналар, замонавий технологиялар ва хизматларнинг турлари ва уларни харид қилиш учун талаб этиладиган инвестициялар ҳисоботи тайёрланмоқда. Ҳайвонларни идентификация қилиш тизимини ишлаб чиқиш бўйича хорижий экспертлар жалб этилмоқда. Айни вақтда ветеринария хизмати лабораторияларини ўрганиш ва керакли тавсиялар ишлаб чиқиш бўйича Халқаро эпизоотик Бюро вакиллари кутилмоқда.
Йиғилишда Ветеринария хизматини ривожлантириш Концепцияси борасида ҳам мулоҳазалар билдирилди.«Юртимизда чорвачилик маҳсулотларининг экспорт салоҳиятини ошириш, гўшт, сут ва гўшт-сут маҳсулотларини халқаро стандартларга мос равишда тайёрлаб, экспортни амалга ошириш муҳим масала. Шу билан бирга Концепцияда юртимиздаги чорва ҳайвонларининг касалланишини олдини олиш, уларга тезкор ташҳис қўйиш мақсадида мавжуд диагностик марказларини замонавий жиҳозлар билан жиҳозлаш, ёш ва иқтидорли мутахассисларнинг билим ва малакасини ошириш алоҳида эътиборда», — дейди Ўзбекистон ветеринария ва чорвачиликни ривожлантириш давлат қўмитаси раисининг биринчи ўринбосари Шуҳрат Жабборов.
Изоҳ (0)