Ўзбекистон январь—апрель ойлари давомида 66,1 миллион долларлик шакар хом ашёсини импорт қилди. Бу ҳақда Давлат статистика қўмитасига таяниб, Spot хабар берди.
Ҳужжатда ёзилишича, бу ўтган йилнинг шу даврига нисбатан 165 маротабага кўп демакдир.
Давлат статистика қўмитаси томонидан тақдим этилган маълумотларга кўра, шакар хом ашёси импорти жорий йил бошидан буён кўтарилмоқда. Январь ойида 23,3 миллион долларни ташкил этган бўлса, январь—февраль ойида — 38,9 миллион долларга тенг бўлган. Январь—март ойида эса 54,4 миллион доллар.
Шунингдек, тайёр шакар импорти пасайишни давом этмоқда — бу ҳам жорий йил бошидан бери кузатиляпти. Ўзбекистон I чоракда 21,7 миллион долларлик хориж шакарини сотиб олган. Бу ўтган йилнинг I чорагига нисбатан 84 фоизга кам демакдир.
Шу билан бирга эндиликда Ўзбекистон Украина шакарини сотиб оладиган асосий харидор эмас — ўтган йили украин шакарининг 90 фоизи харид қилинган бўлса, ҳозирда ушбу кўрсаткич 10—15 фоизга тенг.
Хом ашё харидининг бу қадар кўтарилиши ва тайёр шакар харидининг пасайиши Ўзбекистон маҳаллий ишлаб чиқаришга эътибор қаратаётганидан далолат беради.
Изоҳ (0)