Бош прокуратура ҳузуридаги Департаментнинг Хоразм вилоят бошқармаси томонидан «Матбуот тарқатувчи» АК ходимлари билан ҳамкорликда терговга қадар текшириш ўтказилди. Бу ҳақда Бош прокуратура матбуот хизмати маълум қилди.
Текширишда «Матбуот тарқатувчи» АК Хоразм вилояти шў’ба корхонаси директори О.К. 2017—2018 йилларда обуначилар томонидан тўланган 1,3 миллиард сўмдан 562,3 миллион сўмини ўғли А.К. ва қариндоши С.Ш.га қарашли МЧЖга ўтказиб, талон-торож қилганлиги аниқланди.
Шунингдек, ушбу маблағлар эвазига Captiva, Lacetti, Nexia русумли автомашиналар ҳамда шўъба корхона негизида ташкил этилган Ҳазорасп босмахонаси балансида бўлган ҳақиқий баҳоси 750,0 миллион сўмлик бино ва иншоотларни 16,7 миллион сўмга сотиб олиб, жиноий фаолиятдан олинган даромадларни легаллаштирган.
Текширув давомида етказилган зарардан 562,0 миллион сўми ундирилиши таъминланган.
Худди шундай, «Матбуот тарқатувчи» АК Хонқа филиали раҳбари М.Р. ҳам 2018 йилда обуначилар томонидан тўланган 365,5 миллион сўмдан 214,0 миллион сўмини қариндоши Ш.А.га тегишли бўлган хусусий корхонага ўтказиб, ушбу маблағ эвазига Урганч шаҳридан турмуш ўртоғи А.А. номига уй сотиб олгани аниқланди.
Мазкур ҳолатлар юзасидан О.К. ва М.Р.га нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)