Тошкент вилоятида туризмни ривожлантириш ва туристик хизматлар кўрсатиш сифатини яхшилаш мақсадида 2019 йил 15 майдан эътиборан тажриба тариқасида умумий овқатланиш шохобчалари фаолиятини баҳолаш ва уларга 5 тоифадан иборат «Сифат юлдузи» сертификатини бериш тизими жорий этилди. Бу ҳақда «Халқ сўзи» хабар бермоқда.
Тошкент вилояти туризмни ривожлантириш департаменти матбуот хизматидан хабар қилишича, «Беш юлдуз» аъло даражадаги овқатланиш шохобчаларига берилса, «Тўрт юлдуз» — намунали, «Уч юлдуз» — яхши, «Икки юлдуз» — қониқарли, «Бир юлдуз» — тавсия этиш мумкин тарзида белгиланади.
Умумий овқатланиш шохобчаси фаолиятини баҳолаш ва унга сертификат бериш учун ҳужжатларни расмийлаштириш вилоят Туризмни ривожлантириш департаменти тегишли ташкилотлар билан биргаликда ҳудудларга чиқиб ўрганишлар натижасида амалга оширилади.
Сертификат Тошкент вилояти ҳокимининг туризм ривожлантириш масалалари бўйича ўринбосари, тегишли туман (шаҳар) ҳокими, вилоят савдо-саноат палатаси ҳудудий бошқармаси ва Туризмни ривожлантириш департаменти томонидан тасдиқланади. Сертификатни расмийлаштириш бепул амалга оширилади.
Ушбу сертификатларга эга бўлган умумий овқатланиш шохобчалари тўғрисидаги маълумотлар туристлар учун хизмат кўрсатадиган корхоналарга тақдим этилади.
Изоҳ (0)