Жиноят ишлари бўйича Наманган шаҳар суди томонидан пора беришга ундаган Раҳим Муродов, Бахтиёр Алиев ва Зайнаб Ботировага (исм-шарифлар ўзгартирилган) жазо тайинланди. Бу ҳақда «Дарё»га ЖИБ Наманган шаҳар суди судьяси Нодирбек Раимқулов маълум қилди.
Наманган вилоят Бандлик бошқармаси давлат меҳнат ҳуқуқ инспектори лавозимида ишлаб келган Р.Муродов ушбу бошқарма етакчи мутахассиси бўлиб ишлаган Б.Алиевга юқумли касалликлар шифохонасида ҳамширалик бўш иш ўрни борлиги, 200 АҚШ доллари эвазига ўзининг танишлари орқали ишга жойлаб қўйиши, бунинг учун номзод топишини айтиб, у билан ўзаро келишиб олади.
Шундан сўнг Б.Алиев бу ҳақда таниши, Наманган шаҳар марказий шифохонаси ҳамшираси З.Ботирова билан гаплашиб, ишга кирмоқчи бўлганларни ҳамшира сифатида жойлаш мумкинлигини айтиб, хизмат ҳақи 500 АҚШ доллари бўлишини билдиради.
Улар хизмат мавқеларидан фойдаланиб, фуқаро Одина Маматованинг ишончига кириб, юқумли касалликлар шифохонасига ҳамшира вазифасига ишга киритиб қўйишни ваъда қилади. Пора бермаса ишга кириш қийинлигига ишонтириб, шифохона раҳбарларига пул беришга қизиқтириб, жабрланувчидан 500 АҚШ доллари талаб қилади.
Судланувчилар жорий йил январь ойида жабрланувчидан келишилган 500 АҚШ доллларини олаётган вақтида ҳуқуқни муҳофаза қилиш идораси ходимлари томонидан далилий ашёлар билан қўлга олинади ва жиноий жавобгарликка тортилади.
Судда ушбу жиноят ишини кўриб чиқиш давомида судланувчиларнинг содир этган жиноий ҳаракати айбига иқрор бўлиб берган кўрсатмалари, жабрланувчи ва гувоҳларнинг кўрсатмаларидан ташқари, О.Маматованинг жиноят ҳақидаги аризаси, стенограмма, нарсани олиш, пулга кимёвий ишлов бериш ва тадбир ўтказиш ҳақидаги баённомалар, судга оид экспертиза хулосаси ҳамда ишдаги бошқа далиллар билан ўз исботини топди.
Суд Раҳим Муродовни 2 йил муддатга мансабдорлик ва моддий жавобгарлик вазифаларида ишлаш ҳуқуқидан маҳрум қилиб, энг кам ойлик иш ҳақининг 105 баравари миқдорида жарима жазоси, Бахтиёр Алиевни Бандлик тизимида ишлаш ҳуқуқидан маҳрум қилиб, иш ҳақининг 20 фоизини давлат даромадига ушлаб қолган ҳолда 2 йил 6 ой ахлоқ тузатиш ишлари жазоси, Зайнаб Ботировага иш ҳақининг 20 фоизини давлат даромадига ушлаб қолган ҳолда 2 йил ахлоқ тузатиш ишлари жазосини тайинлади.
Изоҳ (0)