Ортиқ Отажоновнинг вафоти, Ўзбекистонда кузатилган зилзила, Самарқандда ёғган дўл ва куннинг бошқа хабарлари

17 майнинг эътиборга молик янгиликлари — «Дарё» дайжестида.

Бугун, 17 май куни Ўзбекистон, Қорақалпоғистон ва Туркманистон халқ артисти Ортиқ Отажонов 72 ёшида вафот этди.

Ортиқ Отажоновнинг рафиқаси Гулсара ая 4 апрель куни вафот этган эди.

***

17 май куни Ўзбекистонда 3,8 магнитудали зилзила содир бўлди.

Тошкент вақти билан 05:39 Термиз ҳудудида 2 балли зилзила қайд этилган. Зилзила ўчоғи 5 км чуқурликда жойлашган.

***

16 май куни Самарқанд вилояти Самарқанд туманининг тоғли ҳудуди ҳисобланган Оҳалиқ қишлоғида кучли дўл ёғиши кузатилди.

Дўл анча кучли ёғиб, дарахтлар ва экинларга жиддий зарар етказган.

***

Олий Мажлис депутатлари ҳукуматга автомобилларнинг кундузи чироқ ёқиб юриши шартлиги ҳақидаги қоидани бекор қилиш бўйича таклиф киритди.

Вазирлар Маҳкамасининг 2019 йил 9 апрелдаги №292-сонли қарори билан йўл ҳаракати қоидаларига «куннинг ёруғ вақтида барча автомототранспорт воситалари яқинни ёритувчи чироқларини ёки кундузги сигнал чироқларини ёқиб ҳаракатланиши шарт»лиги бўйича ўзгартириш киритилган эди.

***

Ангренда ўқувчи қиз бувисига совға оламан деб, заргарлик буюмлари сотувчисини шафқатсизларча ўлдирди.

Пичоқ билан жароҳатлар етказган қиз жиноят устида қўлга туширилган, у ИИББ ходимларидан қочиб кетишга уринган.