Ижтимоий тармоқларда Тошкент ирригация ва қишлоқ хўжалигини механизациялаш муҳандислари институти талабасининг учинчи қаватдан йиқилиб тушганлиги ҳақида хабарлар тарқалди. Олий ва ўрта махсус таълим вазирлиги ушбу хабарлар юзасидан ахборот берди.
Видеода тасвирланган воқеа бундан икки йил аввал, яъни 2017 йилнинг апрель ойи сўнгида институтнинг Гидротехника қурилиши факультети ўқув биноси ва Тошкент International House академик лицейи биноси ўртасидаги ҳудудда содир бўлган.
Мазкур факультетнинг ўша вақтдаги 4-курс талабаси Ё. Азамат лицей ҳовлисида ўзаро гаплашиб турган танишлари ёнига тезроқ етиб бориш мақсадида катта танаффус эканидан фойдаланган ҳолда дўстлари ёрдамида учинчи қаватдан тушмоқчи бўлиб эҳтиётсизлик қилади. Ва натижада йиқилиб тушади, Ё. Азаматга ҳеч қандай жиддий тан жароҳати етмайди.
Мазкур воқеа ўша вақтда Гидротехника қурилиши факультети талаблари билан муҳокама қилинади, талабанинг ота-онаси билан ҳам тушунтириш ишлари олиб борилади.
Фурсатдан фойдаланиб, Олий ва ўрта махсус таълим вазирлиги ахборот хизмати ОАВ вакилларидан соҳага оид хабарларни ёритишда ҳамкорлик қилиш, факт ва далилларни аниқлаштириб олишга чақиради. Ўзаро ҳамкорлик орқали жамоатчиликка нафақат тезкор, балки ҳаққоний маълумотларни етказиш мумкин.
Изоҳ (0)