Ўзбекистонда Молия вазирлиги томонидан бошланғич устав капитали 25 миллиард сўм бўлган акциядорлик жамияти шаклидаги Ипотекани қайта молиялаштириш компанияси таъсис этилади. Бу Президентнинг «Ипотека кредити бозорини ривожлантириш ва кенгайтиришга оид қўшимча чора-тадбирлар тўғрисида»ги фармонида кўзда тутилган.
Республика тижорат банклари ва бошқа юридик шахсларга ихтиёрий равишда компания таъсисчилари бўлиш ҳуқуқи берилади.
Фармон билан қуйидагилар компаниянинг асосий вазифалари этиб белгиланган:
маҳаллий ва халқаро капитал бозорларида молиявий ресурсларни, шу жумладан, халқаро молия институтлари ва хорижий ҳукумат молия ташкилотларининг маблағларини жалб қилиш ва кейинчалик уларни ипотека кредитларини қайта молиялаштиришга йўналтириш;
аҳолининг арзон уй-жойларга ўсиб бораётган эҳтиёжини қаноатлантириш учун бозор тамойиллари асосида тижорат банкларига молиявий ресурслар тақдим этиш;
шу жумладан, ипотека қимматли қоғозларини чиқариш ва уларни инвесторлар орасида жойлаштириш;
ипотека кредити тизимини такомиллаштиришга кўмаклашиш, ипотека бозорини ривожлантиришнинг замонавий услублари ва воситаларини татбиқ этиш, ипотека кредити ва ипотека қимматли қоғозлар бозорида хавфларни камайтириш ва ликвидликни ошириш;
ипотека кредити ва қайта молиялаштириш соҳасида, шу жумладан, хорижий эксперт ва мутахассисларни жалб қилган ҳолда методологик ва норматив-ҳуқуқий базасини ишлаб чиқишда иштирок этиш.
Маълумот учун, Молия вазирлиги томонидан Осиё тараққиёт банки билан биргаликда Ўзбекистонда ипотека бозорини ривожлантириш дастурини 2019—2021 йилларда амалга ошириш концепцияси ишлаб чиқилган. Унинг доирасида узоқ муддатли барқарор ипотека молиялаштириш тизимини яратиш учун ОТБ томонидан 200 миллион доллар ажратиш назарда тутилган.