Жаҳон банкининг Глобал инфратузилма жамғармаси (GIF) янги «Тошкент—Андижон» пуллик автойўлини қуриш лойиҳаси учун изланиш грантини ажратди. Бу ҳақда Молия вазирлиги хабар бермоқда.
Давлат-хусусий шерикликни ривожлантириш агентлигида 10 май куни Жаҳон банки вакиллари билан автомобиль транспорти соҳасида давлат-хусусий шерикликни ривожлантириш масалаларига бағишланган учрашув бўлиб ўтди.
Агентлик томонидан 2019 йилда ишлаб чиқилиши лозим бўлган лойиҳалар тасдиқланган бўлиб, ҳозирда уларнинг 10 дан ортиғи устида иш олиб борилмоқда. Ушбу лойиҳаларнинг умумий қиймати 2 миллиард долларга тенг.
Жаҳон банки вакилларидан иборат йўл қурилиш бўйича экспертлар тегишли вазирликларда учрашувлар ўтказади. Шунингдек, Тошкент, Наманган, Фарғона ва Андижон вилоятларига бориб, мўлжалланаётган магистрал йўлини ўрганади.
Spot’нинг қайд этишича, Тошкент ва Андижон ўртасида пуллик йўл пайдо бўлиши ҳақидаги хабарлар апрель ойи охирида пайдо бўлганди. Дастлабки режа бўйича, 2019 йилнинг июнь ойида Жаҳон банки билан келишув имзоланади, 2020 йил январига бориб эса лойиҳа ҳужжатлари тайёрланади.
2020 йил апрелида лойиҳа концепциясини маъқуллаш, июнь ойида эса дастлабки саралашда иштирок этиш учун талабнома эълон қилиниши кутилмоқда. Лойиҳа қиймати ҳозирча эълон қилингани йўқ.
Режага кўра, Ўзбекистонда пуллик йўллар фақат бепул муқобил йўл мавжуд бўлган тақдирдагина қурилади. Пуллик йўллардаги ҳаракат тезлиги бепул йўллардагига қараганда юқори бўлиши кутилмоқда.
Изоҳ (0)