13 майнинг эътиборга молик янгиликлари — «Дарё» дайжестида.
Жорий йилнинг 13 май куни олий таълим муассасаларига ўқишга қабул қилишда миллий ҳамда халқаро баҳолаш тизимлари сертификатларини татбиқ этиш чора-тадбирлари тўғрисида Ҳукумат қарори қабул қилинди. Шунингдек, Ўзбекистон Республикаси Президентининг «Олий таълим муассасаларига тест синовлари орқали қабул қилиш тизимини такомиллаштириш бўйича қўшимча чора-тадбирлар тўғрисида»ги қарори қабул қилинди.
Ушбу ҳужжатларга мувофиқ, 2019–2020 ўқув йилидан бошлаб олий таълим муассасаларига ўқишга кириш синовларида бир қатор имтиёзлар белгиланди.
Бундан ташқари, энди абитуриентлардан ҳужжатлар фақат Давлат хизматлари марказлари ёки Ягона портал орқали қабул қилинади. Келгуси ўқув йилидан бошлаб эса абитуриентлар 5 та фандан тест синови топширади.
Шунингдек, 2019/2020 ўқув йили қабулидан бошлаб абитуриентларга олий таълим муассасаларининг тест синови топшириладиган фанлар мажмуаси бир хил бўлган учтагача бакалавриат таълим йўналишида танловда иштирок этиш ҳуқуқи берилди.
***
Юнусобод туман собиқ ҳокими Бахтиёр Абдусаматов 5 йилга озодликдан маҳрум қилинди.
Жиноят ишлари бўйича Тошкент шаҳар судининг 13 май кунги ҳукмига кўра, Бахтиёр Абдусаматовга Жиноят кодексининг 205-моддаси (ҳокимият ёки мансаб ваколатини суиистеъмол қилиш) 2-қисми «а» банди (жуда кўп миқдорда зарар етказган ҳолда) ва Жиноят кодексининг 45-моддасини қўллаб 3 муддатда мансабдорлик ва моддий жавобгарлик юклатилган лавозимлардан ишлаш маҳрум қилинган ҳолда 5 йилга озодликдан маҳрум қилиш жазоси тайинланди.
***
Тошкентда автобус йўловчиси ойнани синдириб, автобусдан тушиб қочиб кетди.
Бошқа йўловчиларнинг гувоҳлик беришича, атрофдагиларга ҳеч қандай зарар етмаган. Аммо йигитнинг ўзи жароҳат олган.
***
Бухорода 2018 йилда туғилган уч эгизакнинг онаси эътиборсизликдан шикоят қилди.
Бухоро вилоят Жондор туманидаги Қозикент қишлоғида бундан роппа-роса бир йил олдин 2018 йилнинг 1 июнида – Халқаро болаларни ҳимоя қилиш байрами куни Фарҳод Туробов ҳамда Маърифат Жўраевалар хонадонида эгизаклар дунёга келган. Эгизакларга Ўзбекистон Президентига эҳтиром сифатида Шавкат, Миромон ва Мирзиё номлари берилган.
***
Ислом Каримовнинг собиқ бош тансоқчиси янги лавозимга тайинланди.
Ўзбекистон Биринчи Президенти Ислом Каримовнинг собиқ бош тансоқчиси сифатида бир неча йиллар давомида фаолият юритган Ахат Носиров Шарқ яккакурашлари ва жанг санъатини ривожлантириш маркази раҳбари этиб тайинланди.
Изоҳ (0)