Карманада фуқарони ишга кириш учун пора беришга ундаган бандлик хизмати ходимларига суд ҳукми ўқилди

Навоий вилоятининг Кармана туманида пора беришга далолат қилган Т.Комилов ва З.Зоиров (исм-фамилиялар ўзгартирилган)га нисбатан суд ҳукми ўқилди. Бу ҳақда жиноят ишлари бўйича Кармана туман суди «Дарё»га маълум қилди.

Маълум бўлишича, Кармана туман Бандликка кўмаклашиш маркази меҳнат инспектори лавозимида ишлаб келаётган муқаддам судланган Т.Комилов туманнинг Бандликка кўмаклашиш маркази Вақтинчалик бир марталик ишлар билан таъминлаш бюроси директори З.Зоиров билан ўзаро тил бириктирган.

Улар хизмат мавқеидан фойдаланган ҳолда фуқаро Д.Очиловни ишончига кириб, хизмат вазифаларига кирмаса-д, уни Навоий шаҳрида жойлашган «Мунжал шифер» компаниясига қоровулликка ишга киритишни ваъда қилган. Улар Д.Очиловни пора бермаса ишга киролмаслигига ишонтириб, компания раҳбарларига пора беришга қизиқтириб, жабрланувчидан 2 миллион сўм талаб қилган.

Судланувчилар 2018 йилнинг 19 декабрь куни жабрланувчидан 1,5 миллион сўмни яшаш уйи ёнида олган вақтда ҳуқуқни муҳофаза қилувчи орган ходимлари томонидан далилий ашёлар билан ушланган. Суд Т.Комиловга 3 йил 7 ой муддатга озодликдан маҳрум қилиш, З.Зоировга эса 2 йил муддатга ахлоқ тузатиш ишлари ва энг кам ойлик иш ҳақининг 60 баравари (12 163 800 сўм) миқдорида жарима жазоларини тайинлаган.