Исроил ҳукумати Голан тепаликларида АҚШ президенти Дональд Трамп номи билан аталадиган посёлка қурилиши учун жой танлади. Бу ҳақда Исроил бош вазири Бенямин Нетаньяху ҳукумат мажлисида маълум қилди, деб хабар беради Meduza.
Исроил шу тарзда Трампга ушбу тепаликларни яҳудий давлатига тегишли деб тан олгани учун миннатдорлик билдирмоқчи.
The Jerusalem Post нашрининг ёзишича, посёлка тепаликнинг шимолида жойлашади. 1991 йили у ерда бир неча бор посёлка бунёд этиш режалаштирилган, бироқ бирортаси амалга оширилмай қолиб кетган. Аввалига ушбу ҳудудга 120 киши жойлаштирилади, уларнинг яримини яҳудийлар, қолганини бошқа миллат вакиллари ташкил этади.
Исроил Голан тепаликларини 1967 йилда Суриядан тортиб олган. Дунёнинг аксар мамлакатлари буни ноқонуний оккупация деб баҳолайди. АҚШ президенти жорий йилнинг март ойида Голан тепаликлари Исроил давлатининг бир қисми дея тан олганди.
Изоҳ (0)