9 май – Хотира ва Қадрлаш куни муносабати билан Самарқанд вилоят ИИБ бошлиғи Азиз Ташпўлатов Иккинчи жаҳон урушида қатнашиб, урушдан сўнг ўз фаолиятини Ички ишлар органларига бағишлаган ҳамда хизмат вақтида ҳалок бўлган ИИБ ходимларнинг уйига ташриф буюриб уларнинг ҳолидан хабар олди.
Самарқанд вилоят ИИБ матбуот хизматининг «Дарё»га маълум қилишича, ташриф чоғида урушда иштирок этган Бектемир Қаршибоев ҳамда Тожибой Ҳамзаевга Қуролли Кучлар Олий Бош Қўмондони Шавкат Мирзиёевнинг байрам табриги, ҳамда 7 500 000 сўм миқдоридаги пул мукофоти, Ички ишлар вазирининг байрам табриги, ҳамда 2 500 000 сўм миқдорида пул мукофотлари тантанали равишда топширилган.
Шунингдек, уларнинг хонадонларига вилоят ИИБ томонидан байрам дастурхони учун турли хил озиқ-овқат маҳсулотлари туҳфа этилди.
Хотира ва қадрлаш куни муносабати билан вилоят ИИБ раҳбарияти марҳум Иброҳим Нишонов яшаган хонадонда бўлиб, унинг оила аъзолари ҳолидан хабар олишди.
Иброҳим Нишонов 2018 йилнинг 24 май куни Самарқанд вилоятининг Паяриқ туманида ўз хизмат вазифасини бажараётган вақтда Damas автомашинасини бошқариб келаётган ҳуқуқбузар томонидан уриб кетилган. Натижада йўл патруль хизмати ходими олган тан жароҳатлари туфайли вафот этган.
Ўзбекистон Президентининг 2019 йил 11 январдаги Фармонига асосан Самарқанд вилояти ИИБ Йўл ҳаракати хавфсизлиги бошқармаси бўлинмалари йўл-патруль хизмати батальони йўл-патруль хизмати учинчи отряди инспектори марҳум Иброҳим Нишонов «Жасорат» медали билан тақдирланган.
Бошқарма ходимлари марҳумнинг оила аъзоларига қимматбаҳо совғалар ва байрам дастурхони учун озиқ-овқат маҳсулотлари туҳфа этишди.
Шунингдек, марҳумнинг ҳамкасблари Иброҳим Нишонов ўқиган Тайлоқ тумани, Галаботир қишлоғида жойлашган 47-умумтаълим мактабига унинг номидан 50 та бадиий ва адабий-сиёсий китоблар ҳадя этди.
Изоҳ (0)