Ўзбекистон мудофаа вазирининг ўринбосари — Ҳаво ҳужумидан мудофаа қўшинлари ва Ҳарбий ҳаво кучлари қўмондони, генерал-майор Аҳмад Бурҳонов бошчилигидаги ҳарбий хизматчилар 3 май куни Иккинчи Жаҳон уруши қатнашчилари — Павел Материков ва Николай Петруниннинг хонадонида бўлиб, Ўзбекистон Президенти номидан пул мукофотларини топширди. Бу ҳақда Мудофаа вазирлиги матбуот хизмати «Дарё»га маълум қилди.
Шу куннинг ўзида Мудофаа вазирлиги ҳузуридаги Жамоатчилик кенгаши аъзолари, давлат ва жамоат ташкилотлари вакиллари, ҳарбий хизматчилар ҳамда ўқувчилардан иборат гуруҳ ҳарбий окрестр садолари остида уруш қатнашчилари истиқомат қилувчи маҳалаларда бўлиб, Иккинчи Жаҳон уруши қатнашчилари ҳамда хизмат бурчини ўташ вақтида ҳалок бўлган ҳарбий хизматчиларнинг оила аъзоларига эсдалик совғаларини улашди.
«Фахрийлар кўнглига йўл топиш орқали ёшлар қалбида кекса авлодга нисбатан фахру ғурур, ҳурмат ҳислари шакллантирилмоқда», — дейилади хабарда.
Ўзбекистон Президентининг 23 апрелдаги «Иккинчи жаҳон уруши қатнашчиларини рағбатлантириш тўғрисида»ги фармони ижросини таъминлаш мақсадида Иккинчи жаҳон уруши қатнашчиларига 7,5 миллион сўм миқдоридаги пул мукофотлари топширилмоқда.
Изоҳ (0)