Ўзбекистон суверенитети ва мустақиллигини сақлаш ҳамда мустаҳкамлаш Президент Ислом Каримовнинг ҳамиша юксак маслаги саналган ва сиёсатининг асосий тамойилига айланган. Бу ҳақда Татьяна Каримова 29—30 апрель кунлари Ислом Каримов хотирасига бағишланган анжумандаги нутқида айтиб ўтди.
«Ўзбекистоннинг янги тарихи, жумладан, мамлакатнинг мустақилликка эришиши Ислом Каримовнинг ҳаёти, фаолияти ҳамда мероси билан чамбарчас боғлиқдир. Унинг юксак давлатчилик тафаккури, келажак қадамларни олдиндан ҳисоблаб чиқиш салоҳияти Ўзбекистонда ҳам, хорижда ҳам муносиб эътироф этилган», — деб қайд этган Биринчи Президентнинг рафиқаси.
«Ислом Каримов жуда мураккаб ва ўта зиддиятли даврда давлат тепасига келди. Ўша вақтда республика фуқаролар уруши, миллатлар ва конфессиялар ўртасидаги тўқнашув ёқасида турган эди. Таъбир жоиз бўлса, ўлка аланга ичида қолган, айрим жойларда қон ҳам тўкилган эди. Ўзбекистон учун мамлакатни юзага келган бошбошдоқликдан олиб чиқиб кета оладиган етакчи жуда ҳам зарур эди. Ана шу паллада Ислом Каримов залворли масъулиятни жасорат ила ўз зиммасига олди», — дея фикрларини давом эттирган Татьяна Каримова.
Шунингдек, Каримов раҳбарлигида ўзбек халқининг миллий ғурури ва халқнинг қадр-қиммати, тарихи, маданияти ҳамда маънавий қадриятлари тикланганини қайд этган.
«Каримов маърифий ўқишлари: Ислом Каримов — мустақил давлат асосчиси» деб номланган республика илмий анжумани Биринчи Президент номидаги ёдгорлик мажмуаси ва Каримов Фонди томонидан, Самарқанд вилоят ҳокимлиги ҳамда Самарқанд давлат университети кўмагида ташкил этилган. Анжуманда тарихчилар, сиёсатшунослар, журналистлар ҳамда илмий доира вакиллари иштирок этган.
Анжуманнинг якуний мажлисида қабул қилинган тавсияларга кўра, анжуман кун тартибига киритилган энг яхши мақолалар Ислом Каримов номидаги ёдгорлик мажмуаси бюллетенида нашр этиб борилиши белгиланди.
Шунингдек, Каримов маърифий ўқишлари бундан буён анъана тарзда ҳар йили баҳорда Ислом Каримовнинг туғилган шаҳар — Самарқандда ўтказилиши маълум қилинди.
Изоҳ (0)