Жиззахдаги пайпоқ ишлаб чиқариш цехининг давлат манфаатига салкам 23 миллион сўм зарар етказгани аниқланди
Мажбурий ижро бюроси Жиззах шаҳар бўлими ходимлари томонидан масъулияти чекланган жамиятга қарашли цех кўздан кечирилганида, корхона табиий газ тармоғига тегишли хужжатлар расмийлаштирмасдан, ўзбошимчалик билан уланиб, табиий газдан ноқонуний фойдаланиб келгани аниқланди. Бу ҳақда «Дарё»га бюро матбуот хизмати хабар берди.
Оқибатда цех томонидан газ таъминоти корхонаси манфаатига 22 миллион 947 минг 860 сўм миқдорида зарар етказилган. Цех масъул ходими Ш.Т ўзининг юқоридаги ноқонуний ҳаракатлари билан Ўзбекистон Республикаси жиноят кодексининг 185-моддаси 2-қисмидаги жиноятни содир этган.
Аммо, Ўзбекистон Республикаси жиноят кодексининг 185-моддаси 6-қисмига кўра, яъни, мазкур ҳуқуқбузар биринчи марта жиноят содир этганлиги, жиноят аниқланган кундан эътиборан ўттиз кунлик муддатда етказилган моддий зарарнинг ўрнини тўлиқ қоплаганлиги, қилган ишидан чин кўнгилдан пушаймон бўлганлиги сабабли жавобгарликдан озод этилди.
