Тошкентда спортчи Мурод Хонтўраевни пичоқлаган шахслар устидан суд бўлиб ўтмоқда

Тошкентда спортчи Мурод Хонтўраевга пичоқ билан жароҳат етказганликда айбланиб, ҳибсга олинган бир гуруҳ шахсларга нисбатан суд иши бўлиб ўтмоқда. Бу ҳақда Олий суд матбуот хизмати «Дарё»га хабар берди.

Жиноят ишлари бўйича Шайхонтоҳур туман судида судланувчилар I. Абдулаҳатов,  Т. Азизов, С. Акбаров, С. Ваденов, О. Содиқов, Ж. Сайназаров ва С. Фатхуллаевга нисбатан жиноят ишини кўриб чиқиш бўйича очиқ суд бўлиб ўтмоқда.

Мазкур жиноий иш жиноят ишлари бўйича Шайхонтоҳур туман суди судьяси Акмал Эргашев раислигида ҳамда халқ маслаҳатчилари Б. Муслимов ва М. Мирҳамидовдан иборат суд таркибида кўриб чиқилмоқда.

Судланувчилар Ўзбекистон Республикаси Жиноят кодексининг 164-моддаси (босқинчилик) 4-қисми «а», «в» бандларида назарда тутилган жиноятни содир этганликда айбланмоқдалар.

12 апрель куни бошланган суд жараёни давомида судланувчилар, жабрланувчилар (М. Хонтўраев, С. Зуннунов ва I. Саидов) ва айрим гувоҳларнинг кўрсатмалари тингланди.

Ҳозирги кунда суд тергови кетаяпти. Қолган гувоҳларнинг кўрсатмалари тингланмоқда.

Суд жараёни давом этмоқда.

Маълумот учун, MMA жангчиси Мурод Хонтўраев 2018 йилнинг 26 ноябрь куни Тошкентдаги «Тошкент савдо маркази» (собиқ «Туркуаз») яқинида жойлашган офисида пичоқлаб кетилган эди. Хонтўраевнинг офисига 10 дан ортиқ номаълум шахслар бостириб кирган. Содир бўлган ҳужум натижасида Мурод Хонтўраев билан бирга Икром Саидов ҳам тан жароҳати олган.