Тошкент вилояти ИИБ Жазони ижро этиш бошқармаси тасарруфидаги 42-сонли манзил колония тартибот бўлинмаси тезкор вакили 27 ёшли А.А.нинг жасади хизмат кийимининг чарм камарига осилган ҳолда 28 апрель куни соат 9:30 да топилган.
Бош прокуратура матбуот хизматининг «Дарё»га маълум қилишича, суд-тиббиёт экспертизасининг дастлабки хулосасида А.А.нинг ўлими бўйин аъзоларининг сиртмоқ билан сиқилиши натижасида юзага келган механик асфиксия, мия ва ўпка шишиши оқибатида келиб чиққанлиги қайд этилган.
«Мазкур ҳолат юзасидан Тошкент махсус прокуратураси томонидан терговга қадар текширув ҳаракатлари олиб борилмоқда, натижаси юзасидан маълумот берилади», — дейилади Бош прокуратура ахборотида.
Аввалроқ, «Бозорқўмлар иши» бўйича тергов қилинган «Чилонзор буюм савдо комплекси» бўлим бошлиғи Дилшод Абдуллаев 2018 йил ноябрида ИИВ ЖИЭББ 1-сонли Тошкент тергов изолятори (Зангиотадаги «Тоштурма»)да вафот этган эди; Бош прокуратура талқинига кўра, у ўз жонига қасд қилган. 2019 йил 30 март куни эса худди шу ҳибсхонада «Бозорқўмлар иши» бўйича иккинчи гумонланувчи — «Бек тўпи» савдо мажмуаси собиқ директори Шукриллахон Эргашев вафот этган эди.
Изоҳ (0)